RSS
أهلاً و سهلاً بكم في نشراتنا الإخبارية لخناقات البنات ... كل خناقة و فيها رسالة أتمنى توصلكم ... و نتمنى لكم خناقات آمنه ... مع تحيات ... بنوتة

الأربعاء، 31 مارس 2010

اتنين مرة واحدة

كيفكم يا جماعة ؟
عاملين إيه ؟
إن شاء الله كلكم بخير
و اللي في جامعة نتيجته طلعت و إن شاء الله يكون عمل كويس
الموووهييييييييم
^ـ^
ننتقل فوراً بكم إلى نقل مباشر لأحداث الخناقة الجديدة
اللي فيها اتنين بحالهم .. مرة واحدة
يا خبببببببببر أبيااااااااااض


----------------------------------------


السلام عليكم


و عليكم السلام ورحمة الله .. حمد لله ع السلامة يا حبيبتي


- حبيبتي ؟؟ تاني ؟ -
ماما أنا هادخل أنام شوية و بعدين أقوم أكمل شغل


انتي وراكي شغل كتير ؟ طب مش هتاكلي الأول


لا يا ماما مش قادرة .. لما أصحى إن شاء الله ربنا ييسر


ماشي يا ستي براحتك

zzzzzzzZZZZZZZZZzzzzzzz
- طبعاً دي بنوتتنا انهرده و هي مندمجة أوي في وصلة النوم بتاعتها-
- عقبالنا يا رب -
^ـ^

و بعد ساعتين

قومي يا حبيبتي كفاية نوم مش قولتي وراكي شغل ؟

خير يا ماما في إيه ؟

مش قولتي هتنامي و تصحي تكملي شغل ؟ أنا قولت أصحيكي

يا ماما و هو أنا قولتلك صحيني ؟

يعني مش عايزة تقومي دلوقتي ؟

و الله شكلك انتي اللي عايزاني دلوقتي .. خير بقى ؟ في إيه ؟

لا أبداً يا حبيبتي و هيكون في إيه يعني ؟

عريس مثلاً .. أصل حبيبتي دي عاملة زي الأطقم اللي في النيش .. بتطلع في أوقات معينة بس
زي لما تبقى في ريحة عريس جاي في السكة .. صح ؟

بصراحة يعني

بصراحتين تلاتة خمسة كمان .. أرد على نفسي و أقول آه .. اللي بعده

آه بصراحة عريس .. و قبل ما تقولي أي حاجة .. يا ريت تقابليه .. و احنا نعمل كل الشغل يومها .. بس وافقي انك تقابليه

تاااااااني ؟

عشان خاطري يا حبيبتي .. اعقلي و اركزي و اهدي كده .. و أنا مش هاخليكي تعملي حاجة يوميها .. ريحي أعصابك بس

ماشي يا ماما .. أمري لله .. حااااضر

حضرلك كل الخير يا حبيبة قلبي .. هتكملي نومك بقى ؟
تحبي أصحيكي امتى

- جرررررررررررر ... يعني انتي مصحياني عشان تقوليلي ع الأخ ده و بس ؟ -
لأ ادخلي نامي يا ماما يا حبيبتي .. يا اللي صحيتيني عشان تقوليلي الحدوتة المسلية دي قبل ما تدخلي تنامي
تصبحي على خير

و انتي من أهل الخير يا حبيبتي .. بس هو كان في حاجة

تااااااني ؟؟؟ خر يا ماما في إيه ؟

هو بصراحة مش عريس اللي جاي ؟

نعم ؟ أمال إيه ؟

بصراحة .. هم اتنين

نااااااااااااااعااااااااااااااااااااااااام ؟؟


-----------------------------------------------------------

ده يا جماعة كان ىخر ما وصلنا عن البنوتة انهرده
و المرة الجاية نقولك على تفاصيل العريسين اللي جايين مع بعض دول
مالهم مظبطين مع بعض ليه كده أنا مش فاهمة ؟
يالا الواحد يعمل إيه بقى ؟
على الأقل الموضوع جه خدمة
خناقات جديدة في الطريق أهي الحمد لله
D:

الثلاثاء، 30 مارس 2010

قلب كبير

اليومين دول حاسة بحالة غريبة
حالة من إعادة الحسابات التلقائية
- التلقائية بتاعة الإعادة مش الحسابات خدوا بالكم من دي -
^ـ^
المهم إني حاسة إن في حاجات بتتغير و حاجات ببتطور
حاجات بتختفي و تانية بتظهر
و حاجات بتتولد جديد
كوكتيل غريب متداخل من الحاجات

يمكن اللي خلاني أركز في الحالة اللي وصلتلها دي
أغنية " قلب كبير " بتاعة سيمبا في الجزء التاني
اللي هي نفسها أغنية " We are ONE "
كلمة فيها فجرت جوايا كل الكلام ده
" لو أدامي 100 طريق .. هاختار قلبي البريء .. طول السنين "
حسيت إني فعلاً في حاجات بتتغير
لكن الأكيد
إني عايزة أفضل زي كيارا
حاجات كتيرة نفسي تفضل موجودة بس تتطور و تكبر
لكن تفضل بريئة صافية
شقية و مجنونة
ممكن ؟

كلام بس حبيت أقوله
بس كده

و الخناقة الجديدة
في الكواليس متقلقوش
^ـ^
وسط كل ده مقدرش أنسى
الخناقات
D:

السبت، 6 مارس 2010

تفكير تفكير تفكير

كيفكم أيها المتطوعون بأعماركم ؟
إن شاء الله كلكم بخير
و أتمنى تكونوا لسه سُلام
D:

ما علينا

حيث إن مفيش اقتراحات و لا حواديت لخناقاتكم وصلتني غير بنوتة قالتلي إن نفسسسسسس اللي بيحصل ده هو اللي بيحصل عندها
فكده نبقى خلصنا خناقتنا الصغنطوطة القطقوطة
^ـ^

و محتاجين نقلب على خناقة جديدة

بيني و بينكم
في بنوتة قالتلي على فكرة هايلة جدااااااا للخناقة الجاية
و إن شاء الله هنزلكم الخناقة دي قريب جداً
و في فكرة خناقة جتلي مش هاقولكم امتى p:

المهم إنه إن شاء الله الخناقات هاحاول بجدية أنزلها قريب جداً

و ذلك بعد عصير مركز من الـ ...
تفكير تفكير تفكير تفكير
^ـ^
 
2009 خناقات بنات Powered by Blogger
Blogger Templates created by Deluxe Templates
Wordpress by Ezwpthemes. تعريب و تطوير : حسن