RSS
أهلاً و سهلاً بكم في نشراتنا الإخبارية لخناقات البنات ... كل خناقة و فيها رسالة أتمنى توصلكم ... و نتمنى لكم خناقات آمنه ... مع تحيات ... بنوتة

الجمعة، 30 أبريل 2010

كلمتين لابد منهم ... و مش بالإكراه

أيوووووة
كلمتين لابد منهم
و أنا اللي عايزة أقولهم
^ـ^
أولاً و أولاً يعني
الخناقة الأخيرة دي
بتاعة .. ما انتو عارفينها بقى خلاص مش لازم أشرح
P:
أهديها لبنوتة عزيزة عليا
هي اللي قالتلي على فكرتها
و أنا كان عليا أمنتجها بس مع السيناريوا المشتعل - و لو إني كان نفسي تبقى أكتر من كده شعللةً
D:
أهديها لـ ... و للا أقولكم
هاسيبها و أشوف هتعرف نفسها و للا الزهايمر عندها اشتغل هي كمان
D:

ده كان أولاً الأولاً
^ـ^

ثانياً ثانياً ثانياً
شكرخاص للباشمهندس عبد الحليم على رسومه لمواقف الخناقة اللي فاتت
- أيييوووووة -
- الرسوم التلاتة اللي في الخناقة الأخيرة دي بتاعته -
- إنتاجه الشخصي و الحصري المهدى لخناقتنا العزيزة -
^ـ^
و طبعاً أنا عن نفسي عاجباني الرسوم جداً
كنت لما باتفرج على كل صورة و أركب الموقف اللي في دماغي عليها
ببقى بضحك جداااااااااااا
بالذات صورة العرسان الأخرانية
^ـ^


الأحد، 25 أبريل 2010

الساعة 7

من غير احم و لا تقديم
و لا كلام كتير
أسيبكوا مع أحداث الـ ... يا مااااااماااااااا
الحقووووووونييييييي

ششششششششششششششششششششش
- انقطاع البث -
- اتفضلوا مع نفسكوا -
- أخلع أنا كمان بقى .. سلام يا جدعان و ابقوا طمنونا عليكو -

-----------------------------------------------------------

مشهد مكرر
الصبح
بس الساعة 5 الفجر

يالا يا حبيبتي اصحى بقى

خير يا ماماااااا

يالا عشان نشوف شغل الشقة ، انتي ناسية انك مدبسانا في اتنين مرة واحدة انهرده ؟

لأ طبعاً مش ناسية ، و هي دي حاجة تتنسي ؟
يالا تصبحي على خير بقى

تصبحي على خير ؟؟؟ يا بنت قومي

لأ مش قايمة
المرة اللي فاتت سمعت كلامك ، المرة دي بقى أنا مش هاعمل حاجة
ما الشقة كويسة أهي
و للا يعني احنا قاعدين في اسطبل مثلاً ؟؟

بس أصـ .....

من غير لا أصل و لا فصل .. تصبحي على خير

تراك
- دي مامتها بكل هدووووووء خرجت من الأوضة -
- ربنا يعينها الست دي و الله -
^ـ^


الضهرية بقى
أو بمعنى أصح
العصرية
الساعة 5

صبااااح الخير

صباح ؟ انتي لسه فاكرة
ده شوية و المغرب هيأدن

و ماله ؟ مش مشكلة برضه
صباح مادام أنا لسه صاحية

آآآآه يا نافووووخيييي .. انتي هتموتيني قبل ما تتجوزي

بعد الشر عليكي يا ماما
خلاص لو الموضوع مدايقك أخليني معاكي
و أنا أقدر أستغنى عنك برضه

آآآآآآآآآآه ياااني .... الرحمة حلوة يا جدعان

خلاص خلاص خلاص
حاضر هاسكت أهو
احنا قولنا معادهم كام ؟

يا مرارتي يانا .. معادهم الساعة كام ؟
معادهم 7 يا حبيبتي

آه صح .. طيب أقوم أنا ألبس بقى و أجهز براااااااحتي

و مستعجلة أوي كده ليه ؟؟ مش بدري ؟

لا يا ماما عشان متبقيش قلقانة

لالالا أبداً مش قلقانة خاااااااااالص
اللهم طولك يا روووووووووووح


الساعة 7 بقى

ترررررررن

السلام عليكم
السلام عليكم
- أكيد لازم الدوبل -
- مش الاتنين مع بعض -
D:

أهلاً أستاذ أ .. أهلاً دكتور ب
- طبعاً خلينا أ و ب بدل ما حد فيكو ييجي يضربني أنا في الآخر -
^ـ^"

إزيك يا عمي ؟
إزيك يا عمي ؟


الحمد لله يا أستاذ أ .. الحمد لله يا دكتور ب

و طنط عاملة إيه ؟
و طنط عاملة إيه ؟

الحمد لله يا أستاذ أ .. الحمد لله يا دكتور ب

مش تعرفنا يا عمي ؟
مش تعرفنا يا عمي ؟
- طبعاً كل واحد بيشاور ع التاني و هو ... احم تفتكروا عايز يعمل فيه إيه ؟ -
^ـ^

أأأااا ....

خير يا عمي في إيه ؟
خير يا عمي في إيه ؟


لا أبداً مفيش أصل ...
- أقول إيه ؟؟ منك لله يا شيخة ع الورطة دي .. البت دي هتطلع إمتى ؟؟
- في سره طبعاً -
D:
 
 
السلام عليكم
- دي مامتها مش هي -
- اصبروا شوية .. إيه الناس دي ؟!؟ -
P:

و عليكم السلام .. إزاي حضرتك يا طنط ؟
و عليكم السلام .. إزاي حضرتك يا طنط ؟


أأأ ... الحمد لله يا بني .. و يا بني
- يادي الورطة .. منك لله ياللي في بالي -
- دعوة خفيفة أوي من القلب زي ما انتو شايفين طبعاً -
D:
 
السلام عليكم
- أهلااااااااااا .. أهي شرفت -
- أخلع أنا بقى من هنا ؟؟؟؟ -
 
و عليكم السلام و رحمة الله .. تشرفنا يا آنـ..
و عليكم السلام و رحمة الله .. تشرفنا يا آنـ..
 
أهلاً بيكو .. يا ترى يا بابا عرفتهم ببعض ؟؟
 
نـ نـ نـ نـ ... إيه ؟
 
طب أعرفكوا أنا ؟؟؟
 
انتي اتجننتي ؟؟؟؟ ايه اللي بتعمليه ده
 
 
 
يا ماما أصبري بس
أحب أعرفكو ببعض
أستاذ أ شغال في ( -- ) و حالياً هو في بيتنا بصفته عريس
دكتور ب دكتور ( -- ) و حالياً برضه في بيتنا بصفته عريس
تحبوا تشربوا حاجة ؟؟
 
..........................
..........................
 
إيه مالكم ؟؟
 
ممكن بس أستفسر عن حاجة ؟
 
أوي أوي .. اتفضل
 
هو إذا كان دكتور ب معاده دلوقتي .. أنا جاي أعمل إيه ؟
 
جاي في معادك برضه
 
لأ معلش أنا آسف .. هو ممكن ياخد معاد تاني و يبقى يشرف فيه
 
نعم ؟؟؟ ليه إن شاء الله ؟
و ليه متاخدش انت المعاد التاني ده ؟؟
 
لإن و بكل بساطة أنا كنت ملتزم بمعادي أكتر منك و جاي في معادي بالظبط
 
يا سلام ؟؟؟ حضرتك أنا واصل قبل المعاد بربع ساعة و كنت مستني تحت لحد بعد المعاد بدقيقة عشان مبقاش عامل أزمة لما أطلع
يبقى حضرتك اللي تاخد معاد تاني
 
لأ طبعاً أنا مش هاتعتع من هنا .. اتفضل انت بالسلامة
 
يا جماعة بالراحة شوية .. هدوا أعصابكم مش كده أمال
بشوييييش بشويييش بشوييييييييييش خاااااالص
ممكن أعرف انتو متضايقين ليه ؟؟
 
أنا لا يمكن أتواجد في مكان واحد مع الشخص ده
 
يا سلام ؟ و ماله الشخص ده إن شاء الله
على الأقل متخصص و مالي مركزي في شغلي .. مش لسه هاعمل دكتوراة عشان آخد تخصص معين و بعدين أفضل أدرس و أتابع و أحضر مؤتمر يمين و مؤتمر شمال و ندوة فوق و مجلس تحت لحد ما أشيب و أقول أنا مين
 
نعم نعم نعم ؟
ليه إن شاء الله ؟ و مالهم الدكاترة يعني
ما انت لو تعبت هتروح لواحد منهم حتى لو امتياز لسه
 
ليه إن شاء الله ؟
من قلة الدكاترة ؟؟
عدموا ؟
 
لا بقى .. انت كده زودتها أوي على فكرة
لم الدور بقى أحسن لك
 
نعم ؟ ليه إن شاء الله ؟ هاخاف منك يعني مثلاً و للا هاخاف ؟
و للا أقولك أموت من الرعب أحسن
 
طب تعالالي بقى انت اللي جنيت على نفسك
 
طرااااااااااااااااااااخ .. دييييييييييب .. ديييييش
  - طبعاً أنا سايبالكم فرصة إنكو تتخيلوا بيعملوا إيه في بعض غير الصورة و باستخدام إيه كمان -
- براحتكو جدا -
D:

 
باس
كفاية أوي عليكو كده
في إيه انتو الاتنين ؟
نسيتوا نفسكوا انتو فين و للا إيه ؟
ما تقول حاجة يا بابا
 
أقول إيه ياختي ؟
ما خلاص ولعتيها
مش ده اللي كنتي عايزة تتفرجي عليه
اتصرفي ياختي
 
طب خلاص بسيطة أوي .. انتـــ  ...
 
تررررررررن
- جرس الباب عادي يعني -
 
إيه ده انتو مستنيين حد تاني ؟؟
إيه ده انتو مستنيين حد تاني ؟؟


لا أبداً كفاية عليكو كده أوي بصراحة .. صعبتوا عليا .. ثواني أشوف مين
أيوة .. مين حضرتك ؟
 
ده بيت الأستاذ ( ..... )
 
أيوة هو
من حضرتك ؟
 
كنت عايزه في موضوع شخصي
 
اللي هو ؟؟
 
كنت عايز أتقدم لبنته الآنسة س
 
 ناااااااااااااااعاااااااااااااااااااااام ؟؟؟؟

الجمعة، 2 أبريل 2010

اتنين .. 2

فاكرين آخر حاجة
كانت من قريب
و آدي الجزء التاني من حدوتة الاتنين
أسيبكو و أخلع أنا
و أنا مالي أنا يا عم
أنا واحدة عايزة تعيش سليمة
D:


-------------------------------------------------




مساء الخير يا ماما
- ده بعد ما صحيت من النوم الحمد لله -


مساء الفل يا حبيبتي

- آه يا خوفي من حبيبتي دي ... ربنا يستر -
هاه يا ماما .. احكيلي و اشجيني


أحكيلك إيه ؟


لا أبداً
أصل بعيد عنك يعني .. و أنا نايمة في أمان الله
لقيت اللي بيصحيني و بيتحفني بإن في عريس جاي
لأو إيه كمان
طلعوا اتنين مش واحد بس كمان شوفتي بقى


أيوة يا حبيبتي .. في اتنين متقدمين لك و كل واحد طبعاً عايز يقعد معاكي


طيب خير خير خيييييييير إن شاء الله .. و أكيد طبعاً كالمعتاد اتفقتوا معاهم من ورايا


لا يا حبيبتي طبعاً .. ما دام بتضايقي يبقى انتي اللي تحددي المعاد


حلو أوي يا ريت يبقى المعاد في البطيخ


نعم ؟؟ قولتي حاجة ؟
- أصلها قالتها بصوت خافت بس انتو مأخدتوش بالكم بس -


لا أبداً .. بقول يشرفونا إن شاء الله
ممكن يوم الخميس الجاي ده إن شاء الله الساعة 9


طب ده واحد و التاني ؟؟!!؟


لا يا حبيبتي .. دول الاتنين ييجوا مع بعض




ناااااااااااااااعااااااااااااااااااااااام ؟؟؟؟


----------------------------------------


ههههههههههههههههه
إيه رأيكم ؟
أول مرة مامة البنوتة بتاعتنا هي اللي تصوت مش كده ؟
يعني قولت تغيير
بس إيه رأيكم في المفاجأة دي ؟
D:
اضحكوا كركروا بقى
و احلموا و تخيلوا إيه اللي ممكن يحصل .. لما عريسين يقابلوا بعض في بيت بنت واحدة هم الاتنين متقدمينلها
D:
و استنوا الكارثة الكبيرة بقى
بس متنسوش المرة الجاية - أهم حاجة - تبقوا لابسين ملابس مصفحة و نضارات حديدية لزوم الحماية
أوك ؟
^ـ^
 
2009 خناقات بنات Powered by Blogger
Blogger Templates created by Deluxe Templates
Wordpress by Ezwpthemes. تعريب و تطوير : حسن