RSS
أهلاً و سهلاً بكم في نشراتنا الإخبارية لخناقات البنات ... كل خناقة و فيها رسالة أتمنى توصلكم ... و نتمنى لكم خناقات آمنه ... مع تحيات ... بنوتة

الاثنين، 24 سبتمبر، 2012

أول خناقة ... بعد الجواز

بعد شهر العسل

سلام عليكم 

ألو .. إزيك يا بت يا خناقاتية ؟ عاملة إيه ؟ وحشتيني جدا ؟
الجواز عامل معاكي إيه ؟ تحبي نتقابل امتى ؟

طب أنا ممكن أرد عليكي طيب و للا الأوبشن ده مش موجود ؟
إيه يا بنتي بالراحة مش كده

أصلك واحشاني جدااااا
احكيلي بقى

أحكيلك إيه ؟

عاملة إيه ؟

-- و بعد اللت و العجن بتاع تليفونات البنات --

طيب ممكن نتقابل بكرة بقى إيه رأيك ؟

طيب تمام .. أستناكي الساعة كام ؟

لااااااا .. مش عندك يا ماما

ليه يا بنتي مش المفروض تيجي تزوري صاحبتك العروسة ؟؟

لا معلش مش أول مرة أشوفك فيها بعد الجواز تكون في شقتك

ليه ؟؟؟؟؟؟؟

أهو كده
مش عايزة أحس إن عمو بتاعك ده خلاص بقى كل حياتك


عدناااااااااا

ياااااااااااااه
وحشتيني جدا جدا جدااااااا يا خناقاتي
و وحشتني دماغي أوي كمان
بجد مفاجأة جميلة جداااااا شغلتلي دماغي بشكل مفاجئ
^ـ^
عدد زيارات المدونة ما شاء الله كويس
- بالنسبة لمدونة مالهاش إعلانات و لا دعاية و بقالها كتير مش بتتجدد -
المهم بقى إني قررت أكمل بإذن الله
خناقات من جديد
^ـ^

الجمعة، 23 سبتمبر، 2011

I'm Baaaaaaaaaaaack

^ـ^
وحشتووووووني جدااااااا يا حروفي و كلماتي و خناقاتي
مخبيش عليكو إني كنت متضايقة أوي إني بقالي كتييييييييييير مكتبتش أي حاجة جديدة
رغم إني متابعة المدونة
و هي أكتر مدوناتي في المتابعات و الإحصائيات - ربنا يخليكوا ليا و يفرحكو زي ما بفرح لما بحس إن حد بيقرا و بيكمل قراية
^ـ^
دعواتكم عشان بفكر في العودة القوية إن شاء الله
و بفكر لسه أجيب شخصية مختلفة و للا نفس الصفات !!!


دعواتكم عشان أرجع بسرعة
^ـ^

الأربعاء، 6 أبريل، 2011

يوم في عمري

تدوينة جديدة في المدونة الأم - إن جاز التعبير عنها كده
لإنها أول مدونة عملتها و كتبت فيها
و كنت غيرت اسمها و بدأت أكتب فيها أكتر
المهم
حكاية يوم من عمري

زي ما خلصنا من الخناقاتية و جوزناها و من بعدها مبفتش عارفة أعمل إيه
- لإن أكيد حرام عليا الراجل اللي د بتار الناس كلها و جننها و اتجنن و اتجوزها أطلع عينه و للا انتو شايفين إيه ؟؟؟ -

أنا كمان عندي اللي خلص مني و اللي ربنا يعينه عليا
^ـ^

و تبقى حكاية

يوم من عمري


السبت، 8 يناير، 2011

دقوا المزاهر يا أهل البيت تعالوا

تيرارااارااا
اححمم
معلش مخدتش بالي
أصلي افتكرت فرح الخنقاتية المفترية اللي كنا بنحكي عنها من قرنين فاتوا
-اتأخرت كتير بس معلش  ، هافرحكوا فيها انهرده -


طبعاً كلكو عارفين الأغنية دي
أصلها أخييييييراً الحمد لله
حلت عن سمانا - أينعم مش عارفة هاتخانق بمين بعدها بس هابقى أدور مش مشكلة -
الموووهيم
و ما حدث كالآتي :


---------------------------------------
آخر حاجة إن الباشا أبو تتنيحة تمام ده سألها على عنوان بيتهم


- نعم ؟؟
صاحبتها - العنوان ...............
- ميرسي أوي و التليفون ؟
- نعم ؟؟؟
صاحبتها برضه - باباها رقم 10.............
- شكراً جداً يا آنسة
سلام عليكم
- .......................
صاحبتها - و عليكم السلام و رحمة الله و بركاته
- هو مين ده ؟؟
- مين ده إيه ؟؟ إنتي مالك في إيه ؟؟
- إيه ؟
- ده أنا متفقة معاهم و أنا مرعوبة و عاملة حسابي بقى هاتعلق و أتقطع و أشوف دم
إيه يا بنتي مالك متنحة كده ليه ؟؟
-هاه ؟؟
- هاه إيه في إيه ؟؟
أوباااااااا اوعي تقولي
- أقول إيه ؟
- هووووووو ده
لولوووو...........
- يا مجنونة انتي اتهبلتي ؟؟
احنا في المول
- طب ما تيجي نروح عندك شوية
- ماشي يا أم المقالب يالا


في بيتها


- قولي و اقري و اعترفي .. مين ده ؟؟
- ده (ف)  صاحب أخويا من أيام الجامعة
عنده ... سنة
شغال ...... و كان بيدور على عروسة
- و انتي غيرتي المهنة لخاطبة مش كده ؟
- لا و الله ، كل ما في الحكاية إنه شافنا مرة في النادي
فاكرة لما قابلنا أخويا و سألناه على اشتراكات النادي ؟؟
- أيوة فاكرة
- هو كان معاهم و عجبتيه
- بس كده ؟؟؟
- آه بس كده
و قال لأخويا و اتفقوا معاي ع الحركة دي
- و ما دام انتي عارفة رقم بابا ، ماديتيهوش الرقم على طول ليه ؟
- عشان ألاقي نفس متعلقة بجد على باب زويلة مش كده ؟؟
- ماشي يا ست الطيبة
- بس قوليلي إيه رأيك ؟؟
- رأيي في إيه ؟؟
- احنا هنزوغ ؟ مش عليا ، رأيــ .....


- معلش يا بنات
بابا بره و عاوزك يا خناقاتية
- خير يا ماما ؟؟
- خير إن شاء الله يا حبيبتي - ابتسامة مريبة
لصاحبتها - أنا مش مطمنة
- يا هبلة روحي
تلاقيه مضيعش وقت


في الصالة


- أيوة يا بابا ؟
- تعالي يا جبيبتي
في واحد اسمه .......... كلمني و هييجي بكرة إن شاء الله بعد العشا
- تاااااااااني بعد العشا ؟؟
- بقولك إيه ؟
عدي المرة دي على خير خلينا نخلص
- نخلص ؟؟!؟؟؟؟؟
- عدييييييييييييها
-حاضر حاضر خلاص




بكرة بقى


صاحبتها أصرت تيجي تتفرج من خلف الأسوا.... احححم .. من خلف الكواليس


-إيه رأيك ؟؟
- شكلك سكر
- بجد ؟؟
- ده احنا مدلوقين أوي
- مدلوقين إيه بلا نيلة
كنت أعرفه أصلاً ؟؟
- ماشي يا ستي بكرة نشوف


في الصالة بعد ربع ساعة


- إزيك يا آنسة ..... ؟
- الحمد لله ، إزاي  حضرتك ؟
- تمام الحمد لله
باباها - انا هاقوم أعمل تليفون بسرعة و جاي
- استنى .. تعالى هنا راايح فيييييييين ؟؟؟ يا سوسة يا بابا مااااااشي -
- إزيك ؟
- الحمد لله
- عاملة إيه ؟
- الحمد لله !!!
- ما احنا طلعنا أهو هاديين وبنات رقيقة اهو أمال كان في إيه بقى ؟؟
- ..............
- لالالا ، و كمان بنحمر
مش مصدق
- ليه يعني ؟؟
هو مش باين إني بنت و للا إيه ؟
- و أنا أقدر أقول حاجة برضه ؟؟
أمال إيه اللي جابني ؟؟
- آه صحيح هو إيه اللي جابك ؟؟
- نعم ؟
- هنرجع تاني و للا إيه ؟
ما كان شكلنا جينتل مان و حاجات إيه حصل إيه ؟؟
- هههههههه ماشي يا ستي
يعني نغني ؟
- إيه ده ؟؟ هو انت بتعرف تغني ؟؟
- يعني هي دي اللي صاحبتك مقالتلكيش عليها و قالتلك ع الباقي ؟؟
- قالتلي على إيه ؟؟
- واضح إن سكتك طويلة
ماشي يا ستي
نكمل المسلسل امتى بقى ؟
- امتى فين ؟؟
- امتى زي ما تحبي في أي مكان في البيت و هاتصرف أجيبلك سماعات كبيرة أو في الناددي أو في أي قاعة أو مكان تحبيه
- إيه ده ليه ؟؟
- لأ مش معقول ؟!!!
هم نسيوا يقولولك إنك بتتخطبي و لا إيه ؟؟
-  أنا ؟؟؟
- أمال أنا ؟؟
- لأ انت أكيد هتخطب مش هتتخطب
- ممممممماااشي
ها موافقة ؟؟
- هو بابا اتأخر ليه ؟ هاروح أندهه


- آه يا سووووووووسة - ده هو في سره المرة دي
:D


- أهلاً يا بني
- أهلاً يا عمي - بيبص ورا الراجل
- واضح إنك جبت آخرها
- ليه في حاجة يا عمي ؟ - و قلقان يا عيني
- آه طبعاً في ، هو انت مش ناوي تقرا الفاتحة و للا إيه ؟؟
- فعلاً ؟؟!!!؟؟؟


من جوه بقى






و بعدهااااااااا






- ألف مبروك يا بني ، مبروك يا خناقاتية
- خناقاتية إيه بقى ما خلاص مفيش الكلام ده ، مش كده و للا إيه ؟
- ليه ؟ هو أنا مش هاتخانق تاني و للا إيه ؟؟
- لسه فيكي نفس ؟؟
- جداااااااااا
- طب يالا بينا

الاثنين، 27 ديسمبر، 2010

و الله بعودة .. يا أستاذة " دماغي "

ياااااااااااااااه
وحشتني أوي دماغي
جدااااااااااااااااااااااااااااااااااااا
- قريت من كام يوم كتاب هيثم دبور الدستوري و كان بيتريق على تعليقة الحروف دي و كل ما أعملها أفتكره و آآآآآآآآآآآآآآآآآآآآضحك -
:D


المهم بقى
بجد بجد بجد
وحشتني حاجات كتيرة أوي
دماغي
شغل التفكير و الدماغ العالي اللي كنت بعمله
تشغيل المخ
الكتابة و الانطلاقة
وحشني أوي أحس إني زي ما أنا دايماً
حرة منطلقة ماليش حدود
فين ما أعوز دماغي توديني


وحشتني أنا
وحشني أكون أنا
وحشتني الضحكة


بصراحة
خسرت حاجات كتير أوي الفترة اللي فاتت دي
و حاولت أصلحها كتير و مكنتش عارفة
و حاجات مكنتش قادرة
بس آديني بقول يا رب
و هابدأ أحاول أعمل جدول باللي ورايا - رغم إن دي أفشل حاجة ممكن أفكر أعملها في حياتي من أيام إعدادي -
:D :D :D
بس يا ميسر الحال يا رب


شوية كده إن شاء الله و أرجع تاني أنا
أرجع أكتب و أحكي و ألت و أعجن و أخبز كمان
^ـ^


انتظريييييييييييييييييييييييييينيييي




ملحوظة مهمة جدااااااااا
التدوينة دي ليا أنا
كلام مني لـ أنا
^ـ^

الأحد، 15 أغسطس، 2010

نعم ؟؟ .. ج2

فاكرين طبعاً
مش هاتكلم
و هاطلع أجري حاااااااااااالاً
و انتو مع نفسكوا
بس ابقوا طمنوني عليكو بس


--------------------------------------------------


- طبعاً البت الخناقاتية المفترية س متنحة من الكائن اللي أدامها اللي فاكر نفسه سيادة العتريس المتعترس اللي مش ناوي يسيب الكرسي -


نعم ؟؟؟؟


خير يا آنسة في حاجة و للا إيه ؟


انت بتستهبل يا بتاع انت و للا بتسعبط ؟
هو إحنا تحت أمرك و للا إيه ؟
امشي من أدامي أحسنلك و إلا أنا مش مسئولة عن اللي هيجرالك


ليه بس كده ده احنا يا دوب هنقعد في الكافية بس نص ساعة و نقوم على طول


و أنا قولت لأ مش نازلة
عندك البتاعة اللي كانت مدبرة الموضوع و انقلعوا انتو
و انتي يا سها و ربنا لهوريكي بس صبرك عليا


الله الله .. ليه بس كده ؟
دي كانت بس قصدها خير


خير ؟؟؟
و هو انت شكلك ييجي من وراك خير ؟


نعم ؟؟
إنتي هتعكي و للا إيه ؟


و انت مالك انت أعك و للا أظبط
مش كفاية انك حشرت مناخيرك .. استحمل بقى اللي يجرالك


نعم ؟؟


إيه نعم نعم دي ؟
إيه ؟ مبتسمعش ؟  و للا مبتفهمش ؟؟


نعم ؟؟


تاني ؟؟


إيه ؟؟


لا بقى ده انت كده ....
طب و الله لتشوف على إيدي
تعالالي بقى
- يا خراشي .. البت بتطلع إزازة برفان من بتوع سها صاحبتها و بتحدفها ع الغلبان -
طاخ طيخ طوخ طاااااااااااااخ


آي
إيه يا مفترية ده ؟


مفترية ؟
هو انت لسه شوفت حاجة
طب و الله لتشوف


طب بس بس بس


نعم ؟


فيها إيه دي ؟ بقولك بس
أنا ماشي
بس الأول عايز أعرف حاجة


نعم ؟؟ هتكمل استهبال ؟؟


لا و الله
بس ممكن تقوليلي العنوان ؟؟


عنوان إيه ؟؟


أكيد مش عنوان المول يا أستاذة افترا المفترية
هم بصراحة عنوانين
عنوان المحل اللي جبتوا منه إزازة البرفان ده


أفندم ؟؟


آه محل البرفانات
أصل بجد ريحة البرفان دي حلوة
و ممكن أجيب منه هدية لواحدة كده في بالي


الدور اللي فوق تاني محل على الشمال جنب سلم الكهربا


اللي طالع و للا اللي نازل ؟


لأ اللي نازل


تمام أوي ميرسي جداً
ممكن بقى العنوان التاني ؟


عنوان إيه ؟؟


عنوان بيتكو


نعم ؟؟؟
 
2009 خناقات بنات Powered by Blogger
Blogger Templates created by Deluxe Templates
Wordpress by Ezwpthemes. تعريب و تطوير : حسن