RSS
أهلاً و سهلاً بكم في نشراتنا الإخبارية لخناقات البنات ... كل خناقة و فيها رسالة أتمنى توصلكم ... و نتمنى لكم خناقات آمنه ... مع تحيات ... بنوتة

الخميس، 10 ديسمبر 2009

ربنا عرفوه بالعقل

السلام عليكم
على غير العادة
واخدين أجازة
يعني
الدنيا زحمة شغل و ما إلى ذلك و قولنا الناس تريح أعصابها برضه من الخناقات
أول مرة أناقشكم في مشكلة من الحاجات اللي بنعترض - أو ع الأقل أنا باعترض - عليها في شكل طبيعي
كلام عادي مش في صورة خناقة

أكتر حاجة بتستفزني بصراحة في مجتمعنا
إنه بوشين بمعنى كلمة بوشين
يعني تلاقي الواحد يكلمك و يقعد يقنعك فيك بالساعات
و لما تعمل فيها عبيط و مش فاهم و بتتنك
تلاقي يهب فيك و يقولك الجملة الشهيرة :
" يا بني آدم .. ربنا عرفوه بالعقل "
حلووووووووووو أووووي
انقل معايا بقى لجوا بيته
تلاقي ماشي مع أفراد منزله عايش بالأسلوب التالي :
" هو كده "
" أنا قلت كده "
" انتو تسمعوا الكلام من سكات "
و عيش بقى على الكلام ده كله

نفسي بس حد يفهمني سيكلوجية الناس دي
طبعاً مش الكل كده
بس للأسف
وش القفص كده

و عايزة أقولكم حاجة
أنا من أكبر عشاق بلدي بناسهاو و شوارعها و زخمتها
لكن برضه الحكاية تتقال بالعقل
ليه تكيل بمكيالين ؟
ليه كل واحد بيلف الكورة بمزاجه عشان تخدمه نسبة 999% - مش غلطة مطبعية دول ثلاث تسعات و في المية كمان
^ـ^

و كتير كمان بتبقى الحاجات اللي بيتقال عليها " هو كده و خلاص " دي ليها أسبابها المنطقية و العقلية المقنعة جداً
بس الناس بقت عاملة زي البغبغانات
و هووو كداا و خلاااااص .. عندك اعتراض و للاا إيييه ؟
:P
المهم يعني في الآخر أحب أقول


إن ربنا عرفوه بالعقل
و إن أقرب الناس معرفة بيه .. العلماء
بالبحث العلمي و الأسباب المنطقية
مش بــ " هو كده و خلاص "

الخميس، 26 نوفمبر 2009

العريس و للا العيد ؟؟؟

دلوقتي بفكر في حاجتين
أكتب خناقة العريس ؟
و للا أكتب عن العيد ؟
و بما اننا خلاص بكرة العيد
فلازمن و حاتمن و لابدن - عشان القافية بس ^ـ^
نخلي عمو العريس دوة على جنب دلوقتي
و نقول كل سنة و انتم طيبين
و بالعيد متهنيين
واكلين لحمة و فرحانين
و العيد الجاي على عرفات واقفين

عيد سعيد
و كل عام و أنتم بخير
^ـ^
و العيدية هتاخوها متأخر
خناقة العريس
عشان محدش يقولي فين عيديتي
:P

الثلاثاء، 10 نوفمبر 2009

بقيتي عروسة يا حبيبتي

نونة حبيبتي
- خير اللهم اجعله خير يا رب ، ماما بتقول يا حبيبتي ؟!!! حاسس بمصيبة جايالي . يا لطيف يا لطيف -
أيوه يا ماما تأمري بحاجة ؟
تعالي يا حبيبتي عايزاكي في كلمتين
حاضر يا ماما
حضرلك الخير يا حبيبتي
- يا لطيف يا لطيف .. استر يا رب -
في واحدة صاحبتي من زمان أوي يا نونة و هتيجي تزورني بكرة ، و كان نفسي أوي أعرفك عليها ، هي كانت شافتك و انتي عندك سنتين
يااااااااااه ؟ سنتين يا ماما ؟ و من ساعتها مجتش
معلش يا بنتي الظروف و الدنيا مشاغل برضه
- يا خوفي يا ماما من اللي المشاغل بتجيبه -
تاني يوم بقى
أهلا أهلا يا مدام أميرة ، نورتي يا حبيبتي
بنورك يا مدام سها ، إزيك و إزي بنوتتك ؟ أكيد دلوقتي بقت عروسة زي القمر
ربنا يكرمك يا حبيبتي ، نونة تعالي سلمي على طنط أميرة
إزيك يا طنط ؟
إزيك يا حبيبتي ، بسم الله ما شاء الله ، كبرتي و بقيتي عروسة
- أنا قولت الزيارة المتأخرة دي وراها مصيبة -
ربنا يخليكي يا طنط ، شكراً
إيه رأيك في نونة يا مدام أميرة ؟ بقت سكر أوي
آه ما شاء الله عليها
- الله أكبر .. قمر و شكر و عروسة ... استر يا رب .. أنا قلت في مصيبة برضه -
معلش يا مدام أميرة ، كان نفسي تقعي و تتعرفي على نونة أكتر بس وراها شغل كتيرأوي بتخلص فيه جوا ، مش هتدخلي تكمليه يا نونة ؟
- هااه ؟؟ شغل ؟؟؟ هي بتكلمني أنا ؟؟؟؟؟ -
آيوة يا ماما ، أنا يا دوب ألحق أخلص
ووووووووش
- و اتقفلت الستارة بين الصالة و باقي الشقة -


بعد 3 ، 4 ، 5 ، 6 ، 7 ساعات كده
نونة يا حبيبتي ، فاضية شوية يا قلبي ؟
- أههلللللللااااااً -
آه أوي أوي يا ماما ، اتفضلي
تسلميلي يا قلبي
قوليلي يا نونة
انتي مفيش واحد داخل دماغك كده و للا كده ؟؟؟
- أوبببااااااااااااا .. وقعنا في الغلط -
ولد إيه يا ماما ؟ احنا هنهزر ؟
يا بت بس ردي على قد السؤال
لأ طبعاً ، و أنا إيه اللي يخليني أفكر في حاجة سخيفة زي دي أصلا من أساسه
يعني .. أصل .. أصل بصي بصراحــ ...
ماما بصي ، جيبي م الآخر ، ست أميرة شكلها لا صاحبتك من زمان و لا الحدوتة دي أساساً ،  و شكلها جايبه عريس هنا بالغلط ، صح ؟
لأ
أماااال ؟
هي صاحبتي من مدة آه ، جايبة عريس هنا لكن مش بالغلط ، هو انتي مش بنت و هتتجوزي و للا إيه ؟
بنت .. يمكن ، لكن أتجوز دي بقى فيها شبهة
نعم نعم نعم ؟ شبهة ليه إن شاء الله
عشان أنا مش عايزة حاجة دلوقتي
يا سلااام ، يعني ناوية تفضلي مبلطالي هنا و للا إيه ؟
- بدأنا .. نشمر بقى -
أنا قلت كده ؟ أنا قلت مش دلوقتي ؟
و اشمعنى بقى ؟
عشان عايزة أركز في الحاجات اللي أنا بعملها
ليه ياختي إن شاء الله ؟ بتعملي إيه يعني ؟ بتديري بلد ؟
- بقااا كييدااااا ... طاااااااااااااااييب -
آه بقى ، بدير البلد ، فيها مشكلة دي ؟
هو يعني حرام حتى تشوفيه و للا يشوفك ؟ ده إيه الغلب ده
و لا غلب و لا يحزنون و لا حتى يفرحون ، قلت لأ يعني لأ ، مش عايزة يعني مش عايزة ... هو مين اللي في الآخر هيتجوز ؟؟ أنا و للا انتو ؟
يعني حتى مش عايزة تقابليه ؟ يا بنتي و الله شخص كويس و مواصفاته حلوة
مواصفاته ؟؟ هو إيه ده ؟ هو أنا هاشتري عربية ؟
مزعلاكي أوي مواصفاته ، بلاش ، يا بنتي ده واحد لقطة
لقطة و للا نقطة ، متفرقش
يا بنتيـ ...
أنا قلت مش عايزة أشوفه
اشمعنى هو ؟
الله ، و لا هو و لا غيره .. محتاجة آينشتاين دي عشان يشرحها ؟
طب يعني مينفعشـ ...
لأ لأ لأ لأ
خلاص يا حبيبتي متنفعش لأ دي ، الفاس وقعت في الراس ، و الراجل جاي يوم الجمعة الجاية ، اجهزي عشان تشوفيه
- ناااااااااااااااااااااااااااعااااااااااااااااااااااااااااااااااااام -
مش هاشوفه
لأ هتشوفيه يعني هتشوفيه ، إنتي عايزة تكسفينا ؟
و انتي حد قالك إني عايزة أتجوز ؟ حد قالك تديله معاد ؟؟
هتشوفيه برضه
أنا مش قاعدالكو في البيت يوم الجمعة
ناعاام ؟ ليه إن شاء الله ؟ رايحة فين ؟
رايحة أنتحر .. استريحتي .. المهم أنا مش موجودة
ييجي يشرب الشاي و يتكل على الله
أنا قلت هتشوفيه يعني هتشوفيه
و أنا قلت لأ يعني لأ
بنت ...
بلا بنت بلا بتاع ، خلاص خلصنا
- ترررررااااك -
بالراحة ع اللاب
بلا بالراحة بلا غيره
بنت انتي رايحة على فين ؟ تعالي هنا
لأ مش جاية
استني هنا
لأ مش هاستنى ... لو عوزتزا حاجة أنا عند أماني
طرااااااااااااااااااااااااااخ


- معلش .. ده كان صوت باب الشقة اللي اترزع و صوته وصل من القاهرة لأسوان -
- آآآه يا وداني آآآآآآآآآآآه -
- يخرب بيت الجواز و سنينه أنا ودني هتضيع على ما الموضوع ده يخلص -
أنا أروح أتعالج من دلوقتي أحسن
سلام عليكو

في الكلية .... يووووووووووه .. متعدش ورايا

بفكر جدياً و بشكل جاد و بجدية و ما إلى ذلك من كلمات الجدجدة
إني أغير اسم البلوج من " خناقات .. في بيوت بنات " إلى ... احم
" خناقات بنات ... في كل حتة فيها كائنات "
يعني
بفكر إني أكتب عن خناقات الكلية و خناقات الشارع و خناقات الميكروباصات و خناقات المحلات و و و و و و و وووووووووووووووو
لإن خناقات البنات لكافة الأسباب و جميع المسببات منتشرة بشده و بقوة و قسوة و كل حاجة
و مهما تهاتي و الناس تنادي
" حقوق المرأة " .. " العدل و المساواة بين .. "
تلاااااااقي برضه
الناس هي الناس
و التفكير هو التفكير
و الدماااغ هييي الدماااااااااااااااغ
- يا رب تتغير بقى -
الموووهيييييم
و بما ان في كلية زي كليتي اللطيفة اللذيذة الأمورة دي - على فكرة بحبها و إياك أسمع حد بيقول عليها حاجة
الخناقات فيها .... يوووووه
في الكلية ? ... متعدش ورايا يا عم
معاك للقرن بعد الألفية السادسة
هتضمن تفضل عايش لساعتها ؟؟؟
أشك - إذاً أنا دبوس
:D
المهم يا سادة يا كرام
إني في هذا المقام
حابة أقول التقيل م الكلام
إني بفكر أغير عنوان المكان
و لكم مني في الختام سلام
- ختام النوت دي بس -
أنا أقدر أعيش من غيركو برضه ؟؟
ده كلام ؟
:D
المهم
قولولي إيه رأيكم ؟؟؟
مستنياكم
^ـ^

الخميس، 29 أكتوبر 2009

أمورتي الحلوة

أهلاً بكل من تطوع بعمره ليقرأ الخناقات السابقة
كنت مبسوطة جداً اني باكتب الخناقات اللي فاتت دي
كنت مبسوطة إني بعلق على حاجات متضايقاني
أو بمعنى أصح غايظاني في مجتمعنا
لأ .. ليه
هو كده
و هو كده يعني هو كده
خلصنا
و أنا بصراحة من الناس اللي مستحيل ينجح معاها النظام العبقري ده
لإن أنا أصلاً بنوتة .. احم ... عندية جدااااااا
خصوصاً لو أنا مش مقتنعة بالحاجة
ابقى قابلني بقى لو نفذتها
^ـ^
فأنا كنت فعلاً في غاية السعادة و أنا بعبر عن الحاجات دي
بأسلوب تسبب ان الكل - اللي أعرفهم - ضحكوا و كانت ردة فعلهم حلوة

طب أنا عاملة النوتة دي ليه بقى ؟
هاقولكم
حابة جداً أعرفكم على بنوتة من أعز صاحباتي
تحسها شبهي و مختلفة في نفس الوقت
- الكلام مش غريب على فكرة .. أنا حاساه -
^ـ^
أحب أرحب بيها معايا كمحررة للخناقات
و من دلوقتي
معرفش هينفع و هتقدر فعلاً تظبط الخناقات معايا و للا لأ
بس من دلوقتي بقولها
أهلاً بأمورتي الحلوة
^ـ^

جوا دريم ... درييييييم 2


أهلاً وسهلاً بكم أعزائي المنتحرين
أخيراً فكوا الجبس عن رقبتي
و شالوا كل ملامح المومياوات اللي كانت عندي
- كانت أياااام .. ربنا ما يوريكم -
بس طبعاً بما اني من المنتحرين
فلازم أرجعلكم طبعاً
المهم
سمعت أخبار الخناقة اللي فاتت
و أحب طبعاً أكون مراسل ليكم في نقل حي مباشر ليوم رحلة دريم اللي البنووتة إياها طلعتها بعد الخناقة الفايتة
^ـ^
و إليكم تفصيل الأنباء - هو احنا روحنا لترزي و أنا معرفش و للا إيه ؟
^ـ^

--------------------------------------------------------------------------

هيييييييييييه
طالعين الرحلة
يالا يا بنات مش هنشتغل و للا إيه ؟
واحد
اتنين
تلاتة
يا سواق يا شاطر
ودينا على دريم
يا سواق يا بليد
رجعنا على بيوتنا
- ده كان على الساعة .. امممم .. مش فاكرة .. بس المهم إنه كان بدري -

و تمضي الساعات
و الكل يجري و يلعب
من كبير لصغير
لا فرق بين صغير و لا كبير
الكل يلعب و بقدر جنونه
^ـ^

---------------------------------------

المكان : ملاهي دريم بارك
الزمان : الساعة التاسعة مساءً
الحدث : موبايل البنوتة بيرن " مهما نقع نقدر نقوم " أوبس
دي نغمة حد جبار

السلام عليكم
و عليكم السلام .. انتو فين ؟
- يا أهلاااااااااااان -
أيوة يا ماما احنا لسه في دريم
طب إيه ؟ مش كفاياكو كده و للا إيه ؟
كفايانا إيه يا ماما ؟ الساعة لسه تسعة
نعم ياختي ؟ لسه تسعة ؟ أمال انتو ناويين ترجعوا امتى ان شاء الله ؟
- يا رب عدي اليوم على خير و كمله بانبساط -
يعني يا ماما كمان شوية كده
أيوة الشوية دول كده هيبقو أد إيه يعني ؟
معرفش يا ماما ، ممكن كمان ساعة كده نكون بنتحرك
نعم ؟؟؟ ساعة ؟
إيه يا ماما في إيه ؟ دي دريم
نعم ؟ يعني إيه دي دريم بقى إن شاء الله ؟
يعني الناس بتخرج منها 12 و احنا هنمشي 10 ، أظن كويس أوي
- بذمتكو دريم دي حد يخرج منها قبل 12 يا ناس ؟ -
ماشي ، بس حاولي تقوليلهم تمشوا دلوقتي
- يا سلاااااااااااام ، و أنا همشي الرحلة كلها على مزاجي يعني و للا إيه ؟ -
مينفعش يا ماما
ليه بقى إن شاء الله سعادتك ؟
عشان الرحلة ليها برنامج محدد و متفقين مع السواق على معاد معين ييج فيه
طيب بس حاولوا متتأخروش
حاضر
و متجيش لوحدك
حااضر
و متتأخريش لما توصلوا عند الحصري
حاااااااااااضر
يالا سلام
مع السلامة

-----------------------------------------------

خناقة هادئة نظراً لبعد المسافات و عدم تلاقي المتخانقين
^ـ^
ربنا يديمها نعمه و الناس تهدى كده و تعقل
و تبطل هو كده و خلاص
^ـ^

كانت معكم
بنوتة
مراسلتكم الفدائية
^ـ^

الجمعة، 9 أكتوبر 2009

هيييييييه ... درييييم 1

هييييييييييه طالعين رحلة
ماما ماما
خير يا بنتي في إيه ؟
ماما الـ.... مطلعين رحلة و عايزة أطلع معاهم
رحلة ؟؟ لفين ان شاء الله ؟
دريم بارك ؟
نعم ؟ دريم بارك ؟ و بكام بقى ان شاء الله
- أهلااااااااااااان .. بدأنا -
مش كتير ، و لو هاطلع هادفعهم من فلوسي
نعم ياختي ؟ فلوسك إيه دي ؟ ما انتي كده كده بتاخدي مصروفك من بابا .. يعني كده كده هو اللي دافع
مش الفلوس دي خلاص طلعت من جيبكم .. يبقى خلاص .. بقت بتاعتي
نعم ياختي ؟
إيه ؟مش طلعت من ذمتكم ، يعني خلاص مالكوش دعوة بيها
بقى كده ؟ طب ما سهل جداً أقولك مفيش رحلات .. و اعملي اللي تعمليه
إيه ؟ مفيش رحلات ؟ ليه يعني ؟
أهو هو كده .. عاجبك عاجبك ، مش عاجبك روحي قولي لبابا
يا ماما بقى
بلا ماما بلا بابا
أنا قولت مفيش رحلات
- ماااااااااااشي -

........................................
بعد 3 ساعات
........................................

بابا ؟
نعم ؟ خير ؟
في رحلة لدريم بارك و كل أصحابي طالعينها
و بعدين ؟
- بعدين إيه ؟ هو لازم بالترجمة الحرفي ؟ -
مفيش و لا قلين .. عايزة أطلع معاهم
و هتروحوا إزاي ؟
معرفش
يعني مش هيودوكوا بباصات الـ ... ؟
معرفش يا بابا
أمال هتروحوا إزاي ؟
- أنا مش قولتلك معرفش .. أنا مالي أنا بترتيبات النقل دي .. كانوا عينوني وزير النقل و المواصلات ؟ -
معرفش يا بابا ، في ناس مسئولة عن الباصات اللي هتودينا و تجيبنا
طب و انتوا هتبقوا بنات بس ؟
لأ ، بنات و ولاد
نعم ؟؟ الاتنين مع بعض ؟؟
- يا رب .. يعني لا ده عاجب و لا ده عاجب .. يااا رب صبرني -
لأ يا بابا .. دول باص و دول باص .. على الأقل
و هتروحوا لوحدكوا ؟
لأ معانا مشرفين كبار
- ده على أساس إننا أصلاً عيال ؟؟؟ ياااا رب ارحمني -
ماشي
ماشي ؟
انتي مش كنتي عايزة تطلعي ؟
و مازلت
طيب خلاص و أنا موافق
بجد ؟
آه بجد .. هو مالك في إيه ؟
لا أبداً يا بابا
هو انت هتوافق انها تروح ؟
- مش لازم البهارات دي يعني .. يا رب استر -
خلاص مش مشكلة المرة دي
طيب .. اللي تشوفه
شكراً يا بابا
- الحمممممممد لله -


فووووووووووووووووووووو
---------------------------------------------

عذراً على قطع الإرسال
لكن البنوتة دخلت أوضتها جررررررري بدل ما تدب خناقة أكبر
و حرصاً على الموافقة اللي خدتها
لكن .. طب بس بس بس
مش لازم العياط ده كله
أوعدكم المرة الجاية
في خناقة محترمة
جداااااا

و نطمئنكم ان مراسلتنا الفدائية هي اللي هتنقل لكم الخناقة الجاية بنفسها ان شاء الله
^ـ^
و كل خناقة و انتم سُـلام
:D

الاثنين، 21 سبتمبر 2009

تنويه واجب

السلام عليكم
أعزائي القراء
عايزة بس أقولكم كام حاجة بسيطة كده ع الماشي
الخناقات دي

-- بعض اللي قروها قالولي عيب اللي بتعمليه في مامتك
ده النبي وصى عليها
أحب أوضح إني مبعملش اللي انتو بتقروه ده
أينعم لازم بيبقى في بيني و بين والدتي الحبيبة شد و جذب و مناقرات - أحياناً
لكنها عمرها ما توصل للدرجة دي - الحمد لله

ده يوصلنا للنقطة التانية
-- أمال الكلام ده كله إيه ده ؟
كله من دماغي
ممكن أساس الموضوع موجود
إني مرة جاتلي شغالانة و اترفضت مثلا
طب ألفتي عليها خناقة ليه ؟
لإن في حاجات كتير في مجتمعنا مستفزة و الناس بتتعامل معاها و على أساسها
و كأنها دستور الحياة
في حين إنها كلها غلط في غلط و عك في عك
زي مثلاً لما الحاجة اللي تطلبها تترفض .. و السبب هو كده عشان مينفعش
طب ليه مينفعش .. معرفش ، بس هو كده !!!!!!!!!!
طب حد فيكو يقولي ده إسمه إيه بقى
و لو اتهفيت في عقلك مرة و قولت تحاول تقنعه و تفهمه إنه مفيش حاجة بالشكل اللي هو " هو كده "
هيطلعك في الآخر بني آدم - ده لو أكرمك و مخلكش بقيت حاجة تانية أساساً - مبتفهمش و ممكن كمان غبي و شاذ و مش من البلد دي كمان
لأ و إيه
مجادل و عاشق للجدل و الجدل بيجري في دمك .. إلخ إلخ إلخ مما لذ و طاب
و اللي بيدور على كورس في البتاع إياه ده
مراكز تعليمه مالية البلد
و بالشفا يا رجالة

المهم نرجع لموضوعنا
أنا الحبة بعمل منها قبة
و بكبرها و أعمل منها خناقة - على المدونة بس والله -
بهدف إني أتكلم عن المشاكل و الحاجات دي
لكن بطريقة لذيذة - أتمنى تكون بالنسبة لكم كده فعلاً
بس يا سيدي
آآآدي كوووووووووول الحكاية

حكاية بنوتة مفروسة - مش بتاعة راديو صوتكم
من حاجات كتير في مجتمعها
بتحاول تتكلم عنها
لكن في كلمة و ضحكة بترجمها
لإن الناس مش هتستحملها
لو كانت غتيتة و تقيل دمها
و بتتكلم زي الدبش
لا بيهمها ناس و لا قرش
و تقولك دول بتوع الدش

و لكم مني أجمل سلام
- و حاسبوا على نفسكم في الخناقات الله يكرمكم -
الواحد مش ناقص يتاخد في جناية و تبقى آخرتها إعدام
^ـ^

عايزة أشتغل

احم
إزيكم أعزائي القراء ؟
معنى انكم بتردوا عليا إنكم الحمد لله لسه فيكم نفس
و إن ر بنا يهديكم و ترحموا نفسكوا من الخناقات دي
و تعقلوا و مترموش نفسكم في النار دي - بس متنسوش تشقروا عليا تتطمنو أو تاخدو خبري بسبب خناقة كده و للا كده
^ـ^

معكم خناقة جديدة من توابع زلزا... احم
من توابع الأزمة الاقتصادية العالمـ .... إيه ده إيه ده ؟
إلحقووووووووونيييييييييي

وششششششششششششششششششششششششششششش
- نأسف لانقطاع الخط -
لكن مذيعتنا الفدائية في المستشفى جراء سقوط حاجات غريبة كانت بتتحدف في الخناقة دي
معكم الخناقة
- و ألحق أنا كمان نفسي قبل ما أحصلها -

-----------------------------------------------------------------------------

طرااااااااااااخ
ماما ماما ماما ... باركيلي يا ماما
يا لهوي .. إنتي اتهبلتي يا بت ؟ في إيه ؟
باركيلي يا ماما باركيلي
أباركلك على إيه ياختي ؟ اتجوزتي و للا إيه ؟
بعد الشر عليا ... لأ أحسن من كده
خير اللهم اجعله خير ... بشريني ياختي بشريني
جاتلي وظيفة
ناااااعااااااام ؟
إيه يا ماما ... بقولك جاتلي وظيفة
وظيفة إيه إن شاء الله ؟
هاشتغل في حضانة
يا سلام ؟ و فين الحضانة دي إن شاء الله
في الـ ..... ، قريبة مننا يعني أهو
أما نشوف
نشوف إيه ؟ مش هاتقوليلي مبروك ؟
مبروك ؟ طيب .. مبروك
- اللهم طولك يا روح .. سناني وجعتني من كتر الجز عليها -
الله يبارك فيكي يا ماما
ادعيلي بقى يقبلوني
ربنا يسهل ... يالا تعاليلي ع المطبخ
- يااااااااااااااااا رب ارحمني ياااااااااااااا رب -
-- في المطبخ بقى --
ماما صاحبة الشغل عايزانا في انتر فيو بكرة إن شاء الله الساعة 11
الصبح ؟
- أمال بالليل يعني مثلاً -
أيوة يا ماما الصبح
انتي قولتيلي هتشتغلي إيه ؟
- الله أكبر .. بدأنا شغل الزهايمر -
مدرسة أطفال ، في حضانة
فين الحضانة دي ؟
- يا رب -
جنبينا يا ماما
جنبينا فين ؟
عارفة لما تطلعي على الشارع الرئيسي ، امشي فيه شمال و ادخلي تاني يمين تاني عمارة في الشارع
هم مأجرين عمارة ؟
عمارة عشان حضانة يا ماما ، لأ طبعاً مأجرين دور فاتحينه حضانة
لا و الله ؟
إيه يعني إيه المشكلة ؟
و انتي ناوية تروحي تشتغليلي في حضانة مأجرين شقة ؟
و إيه يعني ؟
دول مأجرين شقة .. يعني مش مضمونين
يا سلام ؟ و يعني لو مأجرين فيلا و للا بانينها يبقوا مضمونين ؟
معرفش بقى بس على الأقل يبقى ليهم مكان كبير
يا سلااااااااااااام .. و أنا هاعمل إيه بالمكان الكبير ده ؟ هو أنا رايحة أشتغل و للا رايحة أشتري شقة ؟
مليش دعوة
ملكيش دعوة بإيه بالظبط ؟ هو مين اللي هايشتغل ؟ أنا و للا انتي ؟
هو كده .. شقة لأ
لييييييييه ؟ عايزة أشتغل بقى
ليه ياختي إن شاء الله ؟ معذبيمك و للا معتقلينك ؟
لأ .. بس عايزة أشتغل ، عايزة أقبض مرتب ، عايزة أشتااغاااااااااااااال
هتعملي إيه يعني بالمرتب
هاشتري اللي نفسي فيه ، مش كل حاجة هاجي هاخد منكو الفلوس و كل شوية تقولولي لأ
بقى كده ، طب مفيش شغل
نعم ؟
مفيش شغل
نااااااااااااعاااااااااااااااااااااام ؟؟؟؟؟؟؟؟
هو كده .. مفيش شغل في شقة يعني مفيش شغل في شقة .. خلصنا
لأ بقى حرام
حرمت عليكي عشتك
لأ يعني لأ ... خلصنااا


- بقى كده ؟ ماشي -
طرررااااااااااااخ
طرررررررررررررررااااااااااااااااااااااااااااااااااخ

------------------------------------------------------

جت سليمة معاهم المرة دي الحمد لله
أصلها راحت رامية كل الإزاز اللي كان في إيديها - مش كانو في المطبخ ؟
و دخلت أوضتها بدل ما تتهور
تكسر الباب أحسن - ديتها علقة و شكراً ... مش إعدام

و إلى لقاء آخر حينما تعود مذيعتنا الفدائية من غرفة رقم 911 بمستشفى ربنا يشفي
دعواتكم لها بالشفاء العاجل

الجمعة، 29 مايو 2009

قومي نامي بقى

عزيزي القارئ
إنت لسه عايش ؟
حمد لله على السلامة
بس بيني و بينك
حاسس إن قلبي مش مطمن
حاسس بخناقة بتقرب
يا لطيف يا لطيف
يا نهار أبيض
ركز كده شوية
سامع اللي أنا سامعه
لا يا عم بقى أنا من دلوقتي هاخلع
سلام عليكم
============================

في إيه يا ماما ؟
كل ده و بتسألي في إيه ؟ ما تقومي يالا
ليه يعني ؟
ليه ؟ يا بنتي بقالك 6 ساعات أدام الكمبيوتر ، إيه ؟ مزهقتيش ؟ متعبتيش ؟
لا يا ستي ، لا تعبت و لا زهقت ، ممكن بقى خلاص تسيبيني
يا بنت يالا قومي
- يوووووووووووه يا مامااااااا -
يا ماما مش عايزة أقوم
ليه يعني ؟ وراكي إيه ؟ بتعملي إيه يعني ؟
يا حبيبتي بكلم صحابي ، و بعدين عايزة أقدم على منحة كده في أوروبا و ...
يالهوي .. في أوروبا ... هي حصلت تقرري تسافري من غير إذن يا أمل ؟
سفر مين يا ماما بس ؟ و مين اللي جاب سيرة السفر دلوقتي ؟
أمال أوروبا إيه اللي هتدرسي فيها ؟
- يا رحمن يا رحيم يا لطيف ألطف بيا -
يا أمي يا حبيبتي ، أنا .. مجرد .. هاقدم .. في منننننحة
و مش هاسافر
أمال هتدرسي إزاي ؟
لاسلكي .. في الهواء
نعم ؟
احم . يعني هادرس من على النت ، هينزلوا المحاضرات على النت و أنا أذاكرها و هامتحن على النت و كل حاجة على النت ، و بعدين يبعتولي الشهادة لحد عندي ... تمام كده يا ست ماما ؟
اممممممممممم
إيه خير تااااااااااني ؟
طب و المصاريف ؟
بالفيزا يا حبيبتي متقلقيش
طيب ما علينا من ده كله .. المهم
- يا رب صبرني -
المهم يا ماما .. زي ما تحبي .. إيه هو بقى المهم ؟
مش هاتقومي ؟
يوووووووووووه بقى .. لأ لأ لأ .. مش قايمة
بنت .. في إيه ؟
يا ماما قولتلك عايزة أعمل حاجات و انتي جاية تقوليلي قومي
آه جاية أقولك قومي
مش هاتقومي تنامي بقى ؟؟

الاثنين، 12 يناير 2009

مش واخداه بقى

.. يا مسهل يا رب ، استعنا على الشقا بالله ..
" بابا "
" أيوة يا حبيبتي "
" أنا عايزة أغير الموبايل "
...................
" بابا "
" معلش كده تاني "
" عايـ..ـزة أغيـــر المووووباااااايل "
" ليه خير ؟ إيه اللي جراله ؟ "
" مجرالوش ، أنا عايزة أغيره "
" طب عايزة أنهي موبايل ؟ و للا لسه هتفكري "
" لأ فكرت و اتفرجت على النت ، عايزة الموبايل ( خلينا نسميه هنا س عشان متبقاش دعاية مجانية بقى ^ـ^ ) "
" و ده بكام تقريباً ؟ "
.. يا حاللولي ، كده شكله هيعمل زي ماما ، يا رب استر ..
" من الأول بس نتفق إني أنا اللي هادفع ، يعني محدش ليه دعوة غالي أو مش غالي "
" طيب ماشي ، سعره كام بقى ؟ "
" يعني ، احتمال يعدي التلاتلاف بشوية "
" كاام ؟!!! "
" تلاتلااااااف "
" طب و انتي عايزاه في إيه ده ؟ "
" في بلوتوث و ميموري حلوة و ويندوز و ... و .... "
"و انتي عايزة ده كله ليه ؟ "
" سلسلة البيزنس بقى و ربنا يسهل "
" طب ربنا يسهل هنا كمان "
" يعني هتدورلي عليه ؟ "
" إن شاء الله "
" ماشي ، سلام عليكم "
" مع السلامة "

و بعد أيااااااام و لياااااااااااالي

" أنا لقيت الموبايل "
" بجد ؟ الحمد لله ، بكام ؟ "
" بألفين و خمسمية "
" طب كويس يعني في فرق كبير أهوه "
" بس في موبايل تاني الراجل وراهولي اسمه ( ص ) و سعره قريب و امكانياته قريبه منه برضه ، بصي عليه الأول و ردي عليا بكره "
" بس يا با.... "
" بصي الأول مش هنخسر حاجة "
" حاضر "

..............

" بابا مش عاجبني ، أنا عيزة س "
" مصرة يعني ؟ "
" آه "
" طيب "

..............

" إيه أخبار الموبايلات ؟ لسه عايزة الموبايل س إياه ؟ "
" آه يا بابا "
" طب بصي ، هو أنا مش معايا اللي يكفي تمنه دلوقتي ، طبعاً أنا صارف مبلغ محترم هدايا و مش باقي كتير ، فلو عرفت أستلف و أدبر المبلغ كان بها ، و لو مكنش يبقى خليها المرة الجاية "
.. آآآآآآآآآه يا نافوخي ياني ، يا رب الرحمة من عندك ..
" ماشي يا بابا ، خلاص خليها المرة الجاية ، لا تستلف و لا تدبر حاجة ، تنزلنا بالسلامة بس و ربنا يبقى يحلها المرة الجاية "
" ماشي يا ستي "

.............

" أنا جبتلك موبايل "
" ناااااااعاااااااااااام ؟ "
"ايه ؟ مش كنتي عايزة تغيريه ؟ أنا جبتلك واحد "
" إزاي إن شاء الله ؟ إذا كان هو أصلاً ممنوع من دخول البلد ؟ "
" لا ما أنا جبتلك واحد صيني و حلو و شكله شيك "
" ماركته إيه إن شاء الله ؟ "
" مالوش ماركه ، صيني "
" طب تسلم الأيادي ، حلال عليك "
" نعم ؟ "
" حلال عليك ، أنا مش دافعة فيه و لا مليم و مش هادفع ، فحلال عليك ، و مبروك الموبايل الجديد "
" بنت "
" ولا بنت و لا مش بنت ، أنا قلتلك عايزة حاجة معينة ، اشتغلت من دماغك ليه إن شاء الله ؟ "
" هتاخديه يعني هتاخديه "
" لا مش واخداه ، مش عاجبني ، شكله مش حلو ، الكاميرا بتاعته زفت ، مش واخداه ، حد عنده مانع "
" أمال أنا جايبه ليه إن شاء الله ؟ "
" و أنا مالي ، انت سألتني ؟ أنا قلتلك هاته ؟ يبقى خلاص مليش دعوة "
" بقى كده "
" آه هو كده "
" طب مفيش موبايل هيتغير "
" أوكي ، بسيطة و مفيش مشاكل "
" ؟؟؟؟؟؟؟؟؟ "
" إيه ؟ مش انت قلت خلاص مفيش تغيير موبايل ، أوكي مفيش تغيير موبايل ، أي خدمة تانية "
" ............. "
" واضح إنو مفيش ، طب كويس أوي ، تصبحوا على خير يا قوم "


و إلى هنا عزيزي المذهول
تنتهي حكاية خناقة الموبايل التانية
طبعاً استايل الخناقات عالي قوي
مرة مع دي و مرة مع ده
حاسب المرة الجاية تكون معاك انت
و مين عارف
يا ترى البت دي
هي بتاعة المرة اللي فاتت ؟؟
سؤال محير
مين يقدر يحله ؟؟
كويس إن مفيش جزم طايرة بتتحدف الليلادي
ألحق نفسي قبل ما يفتكروا الواجب اليومي بتاع الجزم
سلام عليكم يا رجالة

الخميس، 8 يناير 2009

موبايل

" ماما أنا عايزة أغير الموبايل "
" ليه يعني ؟ هو اللي معاكي خلاص اتكل على ربنا ؟ هو لحق "
" هو لحق إيه يا ماما ؟ ده بقالو 3 سنين معايا "
" و هم 3 كتير قوي يعني ؟ "
" يا ستي أنا عايزة أغيره ، فيها إيه دي ؟ "
" يا سلام ؟ و احنا فاضيين لك انتي و موبايلك ؟ مش كفاية مصاريفك و مصاريف الكلية و مواصلاتك ؟ "
" و هو في إيه يعني لما أقول عايزة أغيره ؟ الله ! مش بتاعي ؟ و بعدين .. "
" و لا بعدين و لا قبلين ، أنا مش موافقة ، كفاياكو مصاريف و دلع "
" لا في قبلين و بعدين ، مش لما تسمعي باقي الكلام الأول تبقي تزعقي ؟ "
" ناعام ، ليه إن شاء الله ؟ و هو انتي اللي هتمشي كلامك عليا ؟ "
" أنا مقولتلكيش حاجة أصلاً ، مش لما أبقى أقول حاجة تبقي تزعقي ؟ "
" امشي يا بت من هنا ، آل موبايل آل ، طب جربي تقولي لباباكي و أنا هاقوله لأ ، و نشوف مين اللي هتمشي كلامها على التانية "
" بقى كده ؟ طااايب ماشي "

......

" أنا عايزة أغير الموبايل "
" يا رب ارحمني ، احنا مش اتكلمنا في الموضوع ده قبل كده ؟ "
" لأ ما اتكلمناش ، سيادتك أعدتي تزعقي بس "
" يا شيييييخة ، طب اتكلمي "
" عايزة أغير الموبايل "
" عرفنا و بعدين ؟ "
" من فلوسي يا ستي مش من مصروف البيت و لا من فلوس بابا ، حلو كده "
" آآآآآآه ، طب مش كنتي تقولي من قبل كده بدل الخناق "
.. يا فرحتي دلوقتي أنا اللي غلطانة ، يا رب ارحمني .. " و هو انتي سيبتيني أكمل كلامي ساعتها ، و الله لو كنتي سمعتيني للآخر كنت هاقولك بس انتي اللي بتستنيش عليا "
" ماشي يا لمضة ، نهايته ؟ "
" عايزة أجيب موبايل فيه إمكانيات ، بلوتوث ، ميموري ، كارت ، كاميرات و نت و أوفيس "
" هاه ؟ نعم ؟ و ده منين ده "
" من بره لأنه ممنوع هنا "
" و مين اللي هيجيبه إن شاء الله ؟ "
" أنا عايزة أقول لبابا يشوفهولي قبل ما ينزل أجازة أو يخلي حد من صحابه في الإمارات يشوفهولي "
" طب و بعدين ؟ "
" دي بقى و لا قبلين ، يشوفه و يقولي بكام "
" و هو هيبقى بكام تقريباً ؟ " .. بتوجس طبعاً .. ربنا يستر من البلوة دي و أفكارها ..
" بحوالي تلاتلاف مصري "
" كااااام ؟ ليه إن شاء الله ؟ "
" عاجبني "
" و مش عاجبني "
" و هي مين اللي هتجيبه ؟ مش أنا برضه و للا أنا بيتهيألي ؟ "
" لا و انتي الصادقة ، بتخرفي ، امشي يا بت من هنا "
" لأ مش ماشية بقى ، و عايزة أجيب الموبايل ، ما قلنا أنا اللي هادفع "
" طب انتي حرة ، بس مترجعيش تقولي عايزة فلوس سلف "
" مش عايزة من حد فيكو حاجة ، هو بابا يجيب الموبايل و أنا هادفع تمنه ، خلصنا ؟ "
" انتي حرة "
... فرجت ، أحمدك يااااااااا رب ...
.. الدور و الباقي على بابا ميطلعش روحي هو كمان ..


و دي خناقة النهاردة
و بما ان الخناقة التانية على الموبايل كانت مع باباها و كانت ممتدة و طويييييييييييييلة
فدي بقى محتاجة خناقة لوحدها
تشوفكو الخناقة الجاية على خير
إيه ده ؟
جزمة طايرة
انزل براسك بسرعة
سلام عليكم
أنا لسه عايز روحي

الأربعاء، 7 يناير 2009

خدي اخواتك معاكي

" طب انتي رايحة مع مين ؟ "
" لوحدي "
" طب انتي رايحة ليه ؟ "
" هتمشى "
" مع مين ؟ "
" ما قلنا لوحدي ، الله ! "
" يعني رايحة تذاكري ؟ "
.. في سرها .. يخرب بيت كده ، هما الناس دول بيترجموا إزاي ؟ يا رب ارحمني أتوسل إليك ..
.. علني بقى .. " يا ستي قلتلك هاااروووح أتـ .. مشـ .. ـااااا ، صعبه في إيه دي ؟ "
" هتتمشي بس يعني "
.. اللهم طولك يا روووووووح .. " أيوة يا ستي رايحة لوحدي أتمشى شوية و مش هذاكر ، شوية كده و هارجع "
" يعني محدش من اصحابك رايح معاكي ؟ "
" لأ "
" طيب ، براحتك ، أنا معنديش مانع تروحي النادي "
.. أحمدك يااااااااااا رب ، فرجت ..

" ماما أنا إن شاء الله نازلة بكرة النادي "
" الساعة كام ؟ "
" يعني .. هاجاول أنزل من هنا على 8 إلا ربع أو 7 و نص "
" رايحة تذاكري ؟ "
.. أهلاً و سهلاً ، بدأنا من تااااااني ، يا رب الرحمة من عندك يااااااااااا رب .. " لأ رايحة أتمشى و جاية على طول "
" يعني مش ناوية تذاكري ؟ "
" يا ماما قولتلك لأ لأ لأ ، مش رايحة أذاكر يا ستي ، فيها إيه أما يبقى نفسي أروح أمشي أو أتمشى في النادي ؟ "
" مفيهاش حاجة يا بنتي و من غير متتنرفزي طيب ، بالراحة كده ، اهدي "
" حاضر "
" طب و مين رايح معاكي ؟ "
.. طب يعني أصوت و للا ألطم عشان تصدقني ؟ .. " يا ستي قولتلك خمستلاف مرة رايحة لوحدي ، أنا رايحااااا لوحدييييييييييي "
" طب بالراحة و من غير زعيق "
" طب ما انتوا اللي مبترجموش ، عمالة أقولك رايحة لوحدي ، رايحة أتمشى ، رايحة مش هاذاكر ، و انتي مصرة هتذاكري ؟ هتعملي إيه ؟ مع مين ؟ طب ارحميني و أنا مش هاتنرفز "
" طيب خلاص ماشي "
" أنا نازلة بكرة الساعة 8 تقريباً "
" مش بدري كده ؟ "
.. يووووووووه ، أشد في شعري يعني عشان يرحموني ؟ .. " عاجبني ، عايزة أبقى لوحدي ، خير ، حد عنده مانع ؟ "
" لا أبداً العفو "
" طب يالا بقى ، آديكوا عرفتوا ، تصبحوا على خير "
"و انتي من أهله ، طب بقولك "
.. أستر يا رب .. " خير يا ماما ؟ "
" انتي مش هاتقابلي حد ؟ "
" يا ستي ما قلنا لأااااااااااا "
" طب ما تخدي اخواتك معاكي ؟ "
" ناااااااااااعاااااااااااااااام "

......
.....
....
...
..
.

عزيزي القارئ
نعتذر لهذا القطع المفاجيء في الإرسال نظراً لإقدام البنت النهاردة على دخول السرير دون تعليق و دون إكمال الخناقة خوفاً منها على مستقبلها
حرام يعني البنت تاخد إعدام و هي لسه مجابتش حتى عشرين سنة على جريمة قتل المفروض إنها تبقى " دفاع عما تبقى من أبراج عقلية لدى المتهم "

و نلقاكم على خير في خناقة جديدة
في يوم جديد
مع بنت جديدة

السبت، 3 يناير 2009

خناقات

أيوة خناقات
نعم ؟ في حاجة و لا مؤاخذة ؟
بالراحة بالراحة على مهلك
رايح فين ؟
تعالى بس و اهدا و متقلقش
الخناقة مش معاك انت و الله
اهدا بس كده و اسمعني و أنا هاقولك الحكاية
بص يا سيدي
كل ما في الحكاية
إن الخناقات دي بتحصل في بيوت بنات
نعم يا أخويا ؟
بيوت بنات ؟
آه مالك ؟
بيوت بنات
عادي يعني ما كل البيوت فيها بنات
و كل يوم هتسمع حكاية خناقة جديدة من بنت من البنات دول
مرة سها على أمل على إيمان
مرة تانية تلاقيهم بقوا نهال و جمان و حنان
يعني
كل بنات الدنيا أكيد بيتخانقوا يعني
يبقى اعمل حسابك كل يوم تلاقي حكاية خناقة واحدة من بنات الدنيا
فهمت يا سيدي ؟
ماشي يا عم
آدينا مستنيين

و أول خناقة
أكيد هتبقى بسيطة
بس مين عارف ؟
ممكن نجيب حكاية خناقة ... كارثة
استنوني
^ـ^
 
2009 خناقات بنات Powered by Blogger
Blogger Templates created by Deluxe Templates
Wordpress by Ezwpthemes. تعريب و تطوير : حسن