RSS
أهلاً و سهلاً بكم في نشراتنا الإخبارية لخناقات البنات ... كل خناقة و فيها رسالة أتمنى توصلكم ... و نتمنى لكم خناقات آمنه ... مع تحيات ... بنوتة

الجمعة، 29 مايو 2009

قومي نامي بقى

عزيزي القارئ
إنت لسه عايش ؟
حمد لله على السلامة
بس بيني و بينك
حاسس إن قلبي مش مطمن
حاسس بخناقة بتقرب
يا لطيف يا لطيف
يا نهار أبيض
ركز كده شوية
سامع اللي أنا سامعه
لا يا عم بقى أنا من دلوقتي هاخلع
سلام عليكم
============================

في إيه يا ماما ؟
كل ده و بتسألي في إيه ؟ ما تقومي يالا
ليه يعني ؟
ليه ؟ يا بنتي بقالك 6 ساعات أدام الكمبيوتر ، إيه ؟ مزهقتيش ؟ متعبتيش ؟
لا يا ستي ، لا تعبت و لا زهقت ، ممكن بقى خلاص تسيبيني
يا بنت يالا قومي
- يوووووووووووه يا مامااااااا -
يا ماما مش عايزة أقوم
ليه يعني ؟ وراكي إيه ؟ بتعملي إيه يعني ؟
يا حبيبتي بكلم صحابي ، و بعدين عايزة أقدم على منحة كده في أوروبا و ...
يالهوي .. في أوروبا ... هي حصلت تقرري تسافري من غير إذن يا أمل ؟
سفر مين يا ماما بس ؟ و مين اللي جاب سيرة السفر دلوقتي ؟
أمال أوروبا إيه اللي هتدرسي فيها ؟
- يا رحمن يا رحيم يا لطيف ألطف بيا -
يا أمي يا حبيبتي ، أنا .. مجرد .. هاقدم .. في منننننحة
و مش هاسافر
أمال هتدرسي إزاي ؟
لاسلكي .. في الهواء
نعم ؟
احم . يعني هادرس من على النت ، هينزلوا المحاضرات على النت و أنا أذاكرها و هامتحن على النت و كل حاجة على النت ، و بعدين يبعتولي الشهادة لحد عندي ... تمام كده يا ست ماما ؟
اممممممممممم
إيه خير تااااااااااني ؟
طب و المصاريف ؟
بالفيزا يا حبيبتي متقلقيش
طيب ما علينا من ده كله .. المهم
- يا رب صبرني -
المهم يا ماما .. زي ما تحبي .. إيه هو بقى المهم ؟
مش هاتقومي ؟
يوووووووووووه بقى .. لأ لأ لأ .. مش قايمة
بنت .. في إيه ؟
يا ماما قولتلك عايزة أعمل حاجات و انتي جاية تقوليلي قومي
آه جاية أقولك قومي
مش هاتقومي تنامي بقى ؟؟

1 التعليقات:

Indo-Lover يقول...

السلام عليك أختي مروة
فارحين بزيارة مدونتك الجميلة، وتقبلي مني تحياتي كالإخوان في الإسلام
أنا طالب إندونيسي بالمغرب، وأود أن أتعرف على الإخوان والأخوات المدونين من دول العرب عموما.
تفضلي بزيارة مدونتي: http://myindonesia-ar.blogspot.com
وللاطلاع على ملف تعريفي في بلوجر، تفضل بالضغط على هذا الرابط:
http://www.blogger.com/profile/00885040882056302479
والسلام عليكم

إرسال تعليق

 
2009 خناقات بنات Powered by Blogger
Blogger Templates created by Deluxe Templates
Wordpress by Ezwpthemes. تعريب و تطوير : حسن