اليوم المنتظر

يا مراحب يا مراحب
دي حتة خناقة
مش هاحكي قبلها كتير
اتفضلوا البث الحي المباشر
بس اتخذوا الأول سواتر
3
2
1
Action

--------------------------------------------------------
الساعة 7 صباحاً
المشهد
سرير متكومة عليه بطانية سمك 17 متر لزوم المزاج العالي في النوم
قومي يالا بسرعة
امممممم اممم اممممممممممممم
يا بنتي قومي بقى و خلصيني
اممم مين ؟ في إيه ؟
مين إيه ؟ أنا ماما يالا قومي
مفيش كلية انهرده
كلية مين بس و أنا مالي بيها دلوقتي
فيه إيه طيب ؟
بقولك قومي
هي الساعة كام ؟
الساعة 7 يالا
بالليل ؟ مش معقول نمت ده كله
بالليل مين يا بنتي ؟ الساعة 7 الصبح
طب يالا بقى تصبحي على خير
نعم ؟
يوووه يا ماما سيبيني بقى أنام
تنامي مين ؟ يا بنتي قووووووووووووووومييييي
يوووووووووووووووووووووووووه .. قومي قومي و الساعة لسه 7 الصبح ؟ في إيه ؟ إيه ؟ هيعيدوا زلزال 92 ؟ إيه يعني في إيه ؟
يا بنتي قومي هننضف الشقة
نااااااااااااااااااااااعااااااااااااااااااااااااااااام ... هننضف الشقة الساعة 7 الصبح ؟
آه يا دوب و يا رب نلحق
و كمان يا دوب و يا رب نلحق ؟؟ ليه إن شاء الله ؟ الريس جايلنا انهرده و للا حاجة ؟؟
لأ .. مش الريس .. العريس ؟
مين ؟ يااااااااااا أهلااااااااااااااااااااااااا .. تشرفنا يا فندم و الله كانت زيارة لطيفة و الله .. يا ريت متكرروهاش تاني .. تصبحي على خير يا ماما
قومي يا بت م الشرير و يالا عشان نشتغل
- اللهم طولك يا روووووووح .. طلعلنا منين ده ؟ -
حاضر يا ست ماما
و آآآآآدي قومة .. أفندم بقى
يالا قومي يالا و نشتغل
م الآخر قولي عايزاني أعمل إيه .. خلينا نقصر
بنت .. عموماً ققومي ابدئي الصالة ، اكنسيها و لمعي النيش و الكمبيوتر و التيلفزيون و الترابيزات و الكراسي و خلصيها وادخلي ع البلكونة
يا فرحتي .. حاضر يا ماما
1
2
3
هوووووووووووب
استعنا ع الشقا بالله

- خلصنا الصالة .. دخلنا على معرفش إيه .. ظبطنا إيه ... هوووووووووووف أخيييييييييييييييييييييييراً خلصنا -

آآآآآآآآآآآآآآآآآخ ياااااااااااني
إيه ده إنتي هتقعدي و للا إيه ؟
يا ماما حرام عليكي سيبيني أرتاح شوية
مفيش وقت ، الراجل زمانه جاي كمان 3 ساعات قومي يالا
3 ساعات و مستعجلة ؟؟ إيه الهم ده ؟
بنت .. قومي يالا طلعي أطقم الشاي و العصير والقهوة و الحلو و الجاتوه و الصواني كمان أم إيد دهبي و المنقوشة فضي و التالتة اللي ا ا ا ا  .. مش فاكراها أوي بس طلعيها برضه و لمعيهم و ظبطيهم
هااااااااه
يووووه .. لسه هاعيد تاني .. قومي يالا اتحركي
جررررررررررررررر ..... حاضر حاضر حاااااااااااااااضر


طبعاً المسلسل ه شغال من الساعة 7 الصبح
دلوقتي الساعة 8 مساء
اتفضلوا
D:

هوووووووووووف خلصنا
أيوة كده عروستي حبيبتي
- أخ استر يا رب -
خير يا ماما ؟ عايزة إيه تاني ؟
سلامتك يا حبيبتي
بس ؟؟؟
آه بس يا حبيبتي ، يالا بقى كده أدخلي خديلك دش دافي كده تروقي بيه و أخرجي ظبطي نفسك عشان لما عريسك ييجي تبقي جاهزة
- عريسي .. يا فرحتي -
عريسي مين يا ماما ؟ ده يا دوووب لسه بيقول احم و أنا موافقتش
بس يا بنت متقاطعيش يالا ادخلي خدي دش
حاااااااضر يا ماما
- جررررررررررررررر . آآآآآآآآآآآآآآآآىخ يا نافووووووووووووووووووووخي -

الساعة 8:30 مساءً
أخيراً خلصتي ؟ كل ده في الحمام ؟
- أهلا و سهلا بدأنا -
حد قالك إني راكبة صاروخ ؟
طب يالا بسرعة ادخلي غيري و البسي حاجة كويسة و ظبطي نفسك
أظبط نفسي في إيه ؟ أنا هالبس عادي ؟
عادي ؟ لأ البسي حاجة شيك كده و حلوة
ليه إن شاء الله ؟ و هو أنا ماشية في الشارع بإيه ؟ خيش و للا جلابية مقطعة ؟؟؟
يا بنتي اسمعي الكلام
بصي بقى .. أنا هالبس لبسي العادي ، ده اللي عندي .. أنا زي ما أنا و محدش ليه حاجة عندي
آآآخ ياني منك
انتي برضه اللي تقولي آخ
بتقولي حاجة ؟
لأ أبدا يا ماما بكح ، أصل اللبس بيجيبلي حساسية
ماشي ، اتفضلي

الساعة 9 مساء

هو سيادة الأخ اللي انتو جايبينه ده مش معاده دلوقتي و للا إيه نظامه ؟
آه دلوقتي
أمال فين سيادته ؟ لابس طاقية الاخفا و للا إيه ؟
اصبري بس كده متبقيش مستعجلة
لا مش مستعجلة خالص على فكرة ، بس مبحبش الاستهبال و المواعيد البايظة

الساعة 9:30 مساء

يا مسهل يا رب .. هو جاي من المريخ و للا عطارد ؟
عشان بس نعرف الطريق عامل إيه ؟

يا بنتي أصبري

حاااااااااااضر

الساعة 10 مساء

لاااااااااااااا ده كده بيستهبل أوي
هو فاكر نفسه مين ؟ أنا مش عايزه أشوف وشه و مش هاقابله

يا بنتي اعقلي الله يهديكي زمانه جاي

ينور .. اقعدوا معاه انتو


تررررررررررررررررررررررررن

شوفتي أهو وصل

وصل ؟ طب وسعولي بقى

هتعملي إيه يا مجنونة ؟

هاعمل إيه يعني ؟ هافتحله طبعاً

بس اهدي و خليكي عاقلة

عقل ؟؟ بيجيبوه منين ده ؟ وسعوا ؟
وقعتوا معايا فل الليلادي



طرااااااااااااااااااااااااااااااااااااااااااااااااااخ
- احم ... ده صوت فتح الباب متقلقوش ... البنت مخدتش اعدام -


احم
أما بقى اللي حصل على باب الشقة
فه مرة تانية
أصل بصراحة اللي حصل ...
احم احم
و للا أقولكم
خلوها النوت الجاية
أشوفكم هنااااااك
سلاااااااااااااام
- الحمد لله خرجت المرة دي سليمة 100% أحمدك ياااااااااااااااا رب -
^ـ^

ربنا عرفوه بالعقل

السلام عليكم
على غير العادة
واخدين أجازة
يعني
الدنيا زحمة شغل و ما إلى ذلك و قولنا الناس تريح أعصابها برضه من الخناقات
أول مرة أناقشكم في مشكلة من الحاجات اللي بنعترض - أو ع الأقل أنا باعترض - عليها في شكل طبيعي
كلام عادي مش في صورة خناقة

أكتر حاجة بتستفزني بصراحة في مجتمعنا
إنه بوشين بمعنى كلمة بوشين
يعني تلاقي الواحد يكلمك و يقعد يقنعك فيك بالساعات
و لما تعمل فيها عبيط و مش فاهم و بتتنك
تلاقي يهب فيك و يقولك الجملة الشهيرة :
" يا بني آدم .. ربنا عرفوه بالعقل "
حلووووووووووو أووووي
انقل معايا بقى لجوا بيته
تلاقي ماشي مع أفراد منزله عايش بالأسلوب التالي :
" هو كده "
" أنا قلت كده "
" انتو تسمعوا الكلام من سكات "
و عيش بقى على الكلام ده كله

نفسي بس حد يفهمني سيكلوجية الناس دي
طبعاً مش الكل كده
بس للأسف
وش القفص كده

و عايزة أقولكم حاجة
أنا من أكبر عشاق بلدي بناسهاو و شوارعها و زخمتها
لكن برضه الحكاية تتقال بالعقل
ليه تكيل بمكيالين ؟
ليه كل واحد بيلف الكورة بمزاجه عشان تخدمه نسبة 999% - مش غلطة مطبعية دول ثلاث تسعات و في المية كمان
^ـ^

و كتير كمان بتبقى الحاجات اللي بيتقال عليها " هو كده و خلاص " دي ليها أسبابها المنطقية و العقلية المقنعة جداً
بس الناس بقت عاملة زي البغبغانات
و هووو كداا و خلاااااص .. عندك اعتراض و للاا إيييه ؟
:P
المهم يعني في الآخر أحب أقول


إن ربنا عرفوه بالعقل
و إن أقرب الناس معرفة بيه .. العلماء
بالبحث العلمي و الأسباب المنطقية
مش بــ " هو كده و خلاص "

العريس و للا العيد ؟؟؟

دلوقتي بفكر في حاجتين
أكتب خناقة العريس ؟
و للا أكتب عن العيد ؟
و بما اننا خلاص بكرة العيد
فلازمن و حاتمن و لابدن - عشان القافية بس ^ـ^
نخلي عمو العريس دوة على جنب دلوقتي
و نقول كل سنة و انتم طيبين
و بالعيد متهنيين
واكلين لحمة و فرحانين
و العيد الجاي على عرفات واقفين

عيد سعيد
و كل عام و أنتم بخير
^ـ^
و العيدية هتاخوها متأخر
خناقة العريس
عشان محدش يقولي فين عيديتي
:P

بقيتي عروسة يا حبيبتي

نونة حبيبتي

- خير اللهم اجعله خير يا رب ، ماما بتقول يا حبيبتي ؟!!! حاسس بمصيبة جايالي . يا لطيف يا لطيف -

أيوه يا ماما تأمري بحاجة ؟

تعالي يا حبيبتي عايزاكي في كلمتين

حاضر يا ماما

حضرلك الخير يا حبيبتي

- يا لطيف يا لطيف .. استر يا رب -

في واحدة صاحبتي من زمان أوي يا نونة و هتيجي تزورني بكرة ، و كان نفسي أوي أعرفك عليها ، هي كانت شافتك و انتي عندك سنتين

يااااااااااه ؟ سنتين يا ماما ؟ و من ساعتها مجتش
معلش يا بنتي الظروف و الدنيا مشاغل برضه

- يا خوفي يا ماما من اللي المشاغل بتجيبه -

تاني يوم بقى

أهلا أهلا يا مدام أميرة ، نورتي يا حبيبتي
بنورك يا مدام سها ، إزيك و إزي بنوتتك ؟ أكيد دلوقتي بقت عروسة زي القمر
ربنا يكرمك يا حبيبتي ، نونة تعالي سلمي على طنط أميرة

إزيك يا طنط ؟

إزيك يا حبيبتي ، بسم الله ما شاء الله ، كبرتي و بقيتي عروسة

- أنا قولت الزيارة المتأخرة دي وراها مصيبة -

ربنا يخليكي يا طنط ، شكراً

إيه رأيك في نونة يا مدام أميرة ؟ بقت سكر أوي

آه ما شاء الله عليها

- الله أكبر .. قمر و شكر و عروسة ... استر يا رب .. أنا قلت في مصيبة برضه -

معلش يا مدام أميرة ، كان نفسي تقعي و تتعرفي على نونة أكتر بس وراها شغل كتيرأوي بتخلص فيه جوا ، مش هتدخلي تكمليه يا نونة ؟

- هااه ؟؟ شغل ؟؟؟ هي بتكلمني أنا ؟؟؟؟؟ -

آيوة يا ماما ، أنا يا دوب ألحق أخلص

ووووووووش

- و اتقفلت الستارة بين الصالة و باقي الشقة -

بعد 3 ، 4 ، 5 ، 6 ، 7 ساعات كده

نونة يا حبيبتي ، فاضية شوية يا قلبي ؟

- أههلللللللااااااً -

آه أوي أوي يا ماما ، اتفضلي

تسلميلي يا قلبي

قوليلي يا نونة

انتي مفيش واحد داخل دماغك كده و للا كده ؟؟؟

- أوبببااااااااااااا .. وقعنا في الغلط -

ولد إيه يا ماما ؟ احنا هنهزر ؟

يا بت بس ردي على قد السؤال

لأ طبعاً ، و أنا إيه اللي يخليني أفكر في حاجة سخيفة زي دي أصلا من أساسه

يعني .. أصل .. أصل بصي بصراحــ ...

ماما بصي ، جيبي م الآخر ، ست أميرة شكلها لا صاحبتك من زمان و لا الحدوتة دي أساساً ،  و شكلها جايبه عريس هنا بالغلط ، صح ؟

لأ

أماااال ؟

هي صاحبتي من مدة آه ، جايبة عريس هنا لكن مش بالغلط ، هو انتي مش بنت و هتتجوزي و للا إيه ؟

بنت .. يمكن ، لكن أتجوز دي بقى فيها شبهة

نعم نعم نعم ؟ شبهة ليه إن شاء الله

عشان أنا مش عايزة حاجة دلوقتي

يا سلااام ، يعني ناوية تفضلي مبلطالي هنا و للا إيه ؟

- بدأنا .. نشمر بقى -

أنا قلت كده ؟ أنا قلت مش دلوقتي ؟

و اشمعنى بقى ؟

عشان عايزة أركز في الحاجات اللي أنا بعملها

ليه ياختي إن شاء الله ؟ بتعملي إيه يعني ؟ بتديري بلد ؟

- بقااا كييدااااا ... طاااااااااااااااييب -

آه بقى ، بدير البلد ، فيها مشكلة دي ؟

هو يعني حرام حتى تشوفيه و للا يشوفك ؟ ده إيه الغلب ده

و لا غلب و لا يحزنون و لا حتى يفرحون ، قلت لأ يعني لأ ، مش عايزة يعني مش عايزة ... هو مين اللي في الآخر هيتجوز ؟؟ أنا و للا انتو ؟

يعني حتى مش عايزة تقابليه ؟ يا بنتي و الله شخص كويس و مواصفاته حلوة

مواصفاته ؟؟ هو إيه ده ؟ هو أنا هاشتري عربية ؟

مزعلاكي أوي مواصفاته ، بلاش ، يا بنتي ده واحد لقطة

لقطة و للا نقطة ، متفرقش

يا بنتيـ ...

أنا قلت مش عايزة أشوفه

اشمعنى هو ؟

الله ، و لا هو و لا غيره .. محتاجة آينشتاين دي عشان يشرحها ؟

طب يعني مينفعشـ ...

لأ لأ لأ لأ

خلاص يا حبيبتي متنفعش لأ دي ، الفاس وقعت في الراس ، و الراجل جاي يوم الجمعة الجاية ، اجهزي عشان تشوفيه

- ناااااااااااااااااااااااااااعااااااااااااااااااااااااااااااااااااام -

مش هاشوفه

لأ هتشوفيه يعني هتشوفيه ، إنتي عايزة تكسفينا ؟

و انتي حد قالك إني عايزة أتجوز ؟ حد قالك تديله معاد ؟؟

هتشوفيه برضه

أنا مش قاعدالكو في البيت يوم الجمعة

ناعاام ؟ ليه إن شاء الله ؟ رايحة فين ؟

رايحة أنتحر .. استريحتي .. المهم أنا مش موجودة

ييجي يشرب الشاي و يتكل على الله

أنا قلت هتشوفيه يعني هتشوفيه

و أنا قلت لأ يعني لأ

بنت ...

بلا بنت بلا بتاع ، خلاص خلصنا

- ترررررااااك -

بالراحة ع اللاب

بلا بالراحة بلا غيره

بنت انتي رايحة على فين ؟ تعالي هنا

لأ مش جاية

استني هنا

لأ مش هاستنى ... لو عوزتزا حاجة أنا عند أماني

طرااااااااااااااااااااااااااخ

- معلش .. ده كان صوت باب الشقة اللي اترزع و صوته وصل من القاهرة لأسوان -

- آآآه يا وداني آآآآآآآآآآآه -

- يخرب بيت الجواز و سنينه أنا ودني هتضيع على ما الموضوع ده يخلص -

أنا أروح أتعالج من دلوقتي أحسن

سلام عليكو

في الكلية .... يووووووووووه .. متعدش ورايا

بفكر جدياً و بشكل جاد و بجدية و ما إلى ذلك من كلمات الجدجدة

إني أغير اسم البلوج من " خناقات .. في بيوت بنات " إلى ... احم

" خناقات بنات ... في كل حتة فيها كائنات "

يعني

بفكر إني أكتب عن خناقات الكلية و خناقات الشارع و خناقات الميكروباصات و خناقات المحلات و و و و و و و وووووووووووووووو

لإن خناقات البنات لكافة الأسباب و جميع المسببات منتشرة بشده و بقوة و قسوة و كل حاجة

و مهما تهاتي و الناس تنادي

" حقوق المرأة " .. " العدل و المساواة بين .. "

تلاااااااقي برضه

الناس هي الناس

و التفكير هو التفكير

و الدماااغ هييي الدماااااااااااااااغ

- يا رب تتغير بقى -

الموووهيييييم

و بما ان في كلية زي كليتي اللطيفة اللذيذة الأمورة دي - على فكرة بحبها و إياك أسمع حد بيقول عليها حاجة

الخناقات فيها .... يوووووه

في الكلية ? ... متعدش ورايا يا عم

معاك للقرن بعد الألفية السادسة

هتضمن تفضل عايش لساعتها ؟؟؟

أشك - إذاً أنا دبوس

:D

المهم يا سادة يا كرام

إني في هذا المقام

حابة أقول التقيل م الكلام

إني بفكر أغير عنوان المكان

و لكم مني في الختام سلام

- ختام النوت دي بس -

أنا أقدر أعيش من غيركو برضه ؟؟

ده كلام ؟

:D

المهم

قولولي إيه رأيكم ؟؟؟

مستنياكم

^ـ^

أمورتي الحلوة

أهلاً بكل من تطوع بعمره ليقرأ الخناقات السابقة

كنت مبسوطة جداً اني باكتب الخناقات اللي فاتت دي

كنت مبسوطة إني بعلق على حاجات متضايقاني

أو بمعنى أصح غايظاني في مجتمعنا

لأ .. ليه

هو كده

و هو كده يعني هو كده

خلصنا

و أنا بصراحة من الناس اللي مستحيل ينجح معاها النظام العبقري ده

لإن أنا أصلاً بنوتة .. احم ... عندية جدااااااا

خصوصاً لو أنا مش مقتنعة بالحاجة

ابقى قابلني بقى لو نفذتها

^ـ^

فأنا كنت فعلاً في غاية السعادة و أنا بعبر عن الحاجات دي

بأسلوب تسبب ان الكل - اللي أعرفهم - ضحكوا و كانت ردة فعلهم حلوة

طب أنا عاملة النوتة دي ليه بقى ؟

هاقولكم

حابة جداً أعرفكم على بنوتة من أعز صاحباتي

تحسها شبهي و مختلفة في نفس الوقت

- الكلام مش غريب على فكرة .. أنا حاساه -

^ـ^

أحب أرحب بيها معايا كمحررة للخناقات

و من دلوقتي

معرفش هينفع و هتقدر فعلاً تظبط الخناقات معايا و للا لأ

بس من دلوقتي بقولها

أهلاً بأمورتي الحلوة

^ـ^

جوا دريم ... درييييييم 2

أهلاً وسهلاً بكم أعزائي المنتحرين

أخيراً فكوا الجبس عن رقبتي

و شالوا كل ملامح المومياوات اللي كانت عندي

- كانت أياااام .. ربنا ما يوريكم -

بس طبعاً بما اني من المنتحرين

فلازم أرجعلكم طبعاً

المهم

سمعت أخبار الخناقة اللي فاتت

و أحب طبعاً أكون مراسل ليكم في نقل حي مباشر ليوم رحلة دريم اللي البنووتة إياها طلعتها بعد الخناقة الفايتة

^ـ^

و إليكم تفصيل الأنباء - هو احنا روحنا لترزي و أنا معرفش و للا إيه ؟

^ـ^

--------------------------------------------------------------------------

هيييييييييييه

طالعين الرحلة

يالا يا بنات مش هنشتغل و للا إيه ؟

واحد

اتنين

تلاتة

يا سواق يا شاطر

ودينا على دريم

يا سواق يا بليد

رجعنا على بيوتنا

- ده كان على الساعة .. امممم .. مش فاكرة .. بس المهم إنه كان بدري -

و تمضي الساعات

و الكل يجري و يلعب

من كبير لصغير

لا فرق بين صغير و لا كبير

الكل يلعب و بقدر جنونه

^ـ^

---------------------------------------

المكان : ملاهي دريم بارك

الزمان : الساعة التاسعة مساءً

الحدث : موبايل البنوتة بيرن " مهما نقع نقدر نقوم " أوبس

دي نغمة حد جبار

السلام عليكم

و عليكم السلام .. انتو فين ؟

- يا أهلاااااااااااان -

أيوة يا ماما احنا لسه في دريم

طب إيه ؟ مش كفاياكو كده و للا إيه ؟

كفايانا إيه يا ماما ؟ الساعة لسه تسعة

نعم ياختي ؟ لسه تسعة ؟ أمال انتو ناويين ترجعوا امتى ان شاء الله ؟

- يا رب عدي اليوم على خير و كمله بانبساط -

يعني يا ماما كمان شوية كده

أيوة الشوية دول كده هيبقو أد إيه يعني ؟

معرفش يا ماما ، ممكن كمان ساعة كده نكون بنتحرك

نعم ؟؟؟ ساعة ؟

إيه يا ماما في إيه ؟ دي دريم

نعم ؟ يعني إيه دي دريم بقى إن شاء الله ؟

يعني الناس بتخرج منها 12 و احنا هنمشي 10 ، أظن كويس أوي

- بذمتكو دريم دي حد يخرج منها قبل 12 يا ناس ؟ -

ماشي ، بس حاولي تقوليلهم تمشوا دلوقتي

- يا سلاااااااااااام ، و أنا همشي الرحلة كلها على مزاجي يعني و للا إيه ؟ -

مينفعش يا ماما

ليه بقى إن شاء الله سعادتك ؟

عشان الرحلة ليها برنامج محدد و متفقين مع السواق على معاد معين ييج فيه

طيب بس حاولوا متتأخروش

حاضر

و متجيش لوحدك

حااضر

و متتأخريش لما توصلوا عند الحصري

حاااااااااااضر

يالا سلام

مع السلامة

-----------------------------------------------

خناقة هادئة نظراً لبعد المسافات و عدم تلاقي المتخانقين

^ـ^

ربنا يديمها نعمه و الناس تهدى كده و تعقل

و تبطل هو كده و خلاص

^ـ^

كانت معكم

بنوتة

مراسلتكم الفدائية

^ـ^